Leit ai jingthoh ka HBDRF sha ki heh ka JHADC, halor ki patta bad LHC ki Labang Nangphyllut

Jowai, Nohprah 16 : Ka Hynñiewtrep Border Dispute Redressal Forum (HBDRF) mynta ka sngi 16 tarik Nohprah 2025 kala leit ban ai jingthoh sha u Chief Executive Member, Land Record & Settlement Officer, Revenue Officer bad ruh sha u nongïalam ka liang pyrshah jong ka Jaiñtia Hills Autonomous District Council, Jowai ban kyrpad bad dawa ïaka Konsil ban pyndep bad pynïoh ei ïaki Patta bad Land Holding Certificates jong ki shnong hapoh ka Elaka Labang Nangphyllut kumba la pynbna da u Chief Executive Member ba don burom jong ka Konsil u ma Thombor Shiwat .
Hadien bala dep ban pynim ïa kane ka Elaka, ai Syrnod ïa u Acting Dolloi bad ïaki Waheh Shnong bad katkum bala pynbna da u CEM ki paid nongshong shnong jong kane ka Elaka ki la dep ban leit ai ïaki Application Forms jong ki kumba 160 lane 170 tylli ei ei naduh ki snem bala dep. Hynrei kaba sngewsih ka long ba haduh mynta ruh kim pat ïoh ïa kine ki kot ki sla kumba ka Konsil kala kular.
Ka Forum ka pyntip ruh ba kat kum ka jingtip ba U Acting Dolloi bad ki Nongïalam jong ka Elaka ki la ïoh jingtip na u Deputy CEM ula ong ba kane ka jingpynbna ban ai ei ïa kine ki Patta bad Land Holding Certificate kala kut bad lehse ki hap ban siew daka dor hi.
Te haka jingïadei bad kane, ka Forum ka kyrpad ïaka Konsil kat ïa kine ki Forms kiba ki la dep pynpoi ne summit te ka Konsil ka dei ban pyndep bad ban ai khlem jingsiew hi namar ba u Acting Dolloi bad ki nongïalam jong ka Elaka kila dep pynbna ïaki paid nongshong shnong khlem jingsiew.
Te lada ong pat ban siew daka dor te kan ktah bad pynsmgew sih ïaki paitbah jong kane ka Elaka nalor ba ki dang long kiba dang pynim thymmai kiba shah lehbeiñ bad kiba duk tasam. Bad kan pynduh jingshañiah ruh ïa u Acting Dolloi bad ki nongïalam jong kane ka Elaka. Kumta kat ïa kine kiba ki ladep summit naduh ki snem bala dep te ka Konsil kan sngewbha ban ai ei bad ïaki ba dang wan te lada shim daka dor ruh kam pher.
Ka Forum ka kyrpad ruh ïaka Konsil ba kan sngewbha ban pyndep kloi katba lah khnang ban ai jingkyrmen, ban ai jingkmen bad ban pynshisha ïaka jinglong trai jong ki paid Khasi Pnar kiba shong basah ha kane ka Elaka ïaka jinglong trai jong ki halor ka Khyndew ka shyiap. Kumba long mynta naka liang ka Karbi Anglong Autonomous Council te kala leit ai ei ha ïing ha ïing ïa kine ki Patta bad Land Holding Certificate ïaki briew kiba shong basah haki thaiñ khappud bad Block- 1&11. Te lada ka Konsil kam shim khia ban pynïoh kloi ïa kine ki kot ki sla jong kine ki nongshong shnong te kan pyn artatien pynduh jingkyrmen ïaki bad kan pynlong ruh ïaka Karbi Anglong Assam ban shim kabu.
Ka jingai kloi bad pynïoh kloi ïaki Dulir Khyndew kan pynsuk ruh ïaka sorkar jylla ban pynbeit noh ïa u pud u sam bad ban pynurlong noh ïaka ban re-transfer biang ïa kane ka jaka sha Meghalaya kumba ladep mynjur daka sorkar Assam naduh ka snem 1957-58. Kane ka long katkum ka kyrwoh bala phah da u bah Chandame Sungoh-Chairman.