Mawkyrwat, Ïaiong 26: Ka kynhun ki nongñiah thuk thuk ka ‘The Ultimate Bikers Association’ (TULBA) jong ka jylla Meghalaya kaba la paw bha ha ki kam leh-i-synei ne ai jingïarap ïa kiba shem lanot hapoh jong ka jylla Meghalaya ha ka 25 u Ïaïong ki la leit ban ai jingïarap ïa kawei ka longïing ha Shnong Um-Nongrim kaba hap ha Wahmawpat Samsymper, East Khasi Hills District.
Ka jingleit ban noh jingïarap jong ka TULBA da ka song pisa ïa ka ïing jong ka kong Daïa Kharsyntiew kaba don 3 ngut ki khunswet ha katei ka shnong.
U General Secretary jong ka TULBA Central Body, u bah Rikyrshan Nongrum, ula buh ki kyntien kyrkhu kyrdoh ïa katei ka longïing khunswet ba kin pdiang da ka jingsngewnguh ïa ki jingai ba rit eh ka jong ki bad ngeit skhem ba kin pyndonkam hok na ka bynta ka jingdonkam jong ka ïing ka sem. U la ai ruh ka kyntien kyrkhu kyrdoh ïa ka ïing ka sem jong ki, ba kin lait na baroh ki jingeh ki jingpang jingshitom ha ka ïing ka sem jong kine ki khunswet.
Ban shu pynkynmaw ba katei ka longïing ka dei kaba dang shu jia ka jingshah bamduh noh ïa ka ïing jong ki ha ka ding ha kaba kane ka jingjia ka la jia ha kine ki khyndiat sngi ba la dep. Namarkata, kum ka kynhun nongñiah ar shaka ka don ka jingthrang ban rat dyngkhong ïa ka jingsuk jingkyrduh, ban ïarap markylliang lyngba da ka jingïasnohkti lang para dkhot da ka ba ïa synñiang pisa khnang ban ïoh ban leh isynei kum ïa ki briew kiba donkam shisha ka jing ïarap.
Ha kane ka sngi la ïadonlang ruh naduh ki nongïalam jong ka TULBA Sawsymper Unit bad kumjuh ruh ki ‘riew rangbah jong ka shnong Um-Nongrim, East Khasi Hills District.
