Lehse na ka daw ka jingtieng, khang lut ki dukan jong ki bar jylla ha sor Khliehriat bad Ladrymbai

Khliehriat naiwieng 24: Ki dukan jong ki bar jylla, ba kynthup ki dukan heh bad ki dukan rit ki la khang khyrdep lut baroh ha sor Khliehriat bad ha Ladrymbai, lah ban ong ba imat na ka daw ka jingtieng ki bar jylla ki khang ia ki dukan.
Ka jingkhang dukan ki bar jylla ka la sdang naduh hynnin ka jan miet jong ka 23 tarik, kata hadien ba ki dkhot jong ka Khasi Students Union bad ki dkhot ka Federation of Khasi Jaiñtia and Garo People East Jaiñtia Hills District ki la teh da ki lama iong ha sor bah Khliehriat ha ki nar jong ka kynroh jong ka ophis u Deputy Commissioner ha Khliehriat, ha ka jingshisha ki dkhot jong kitei ki ar seng ki la teh ïa ki lama ha ka jing jai jai khlem kano kano ka huri hura katba ki bar jylla kiba die dukan ha Khliehriat bad ha Ladrymbai pat ki la shu khang hi ïa ki dukan jong ki bad lap ba tang ki dukan jong ki panar kiba plie.
Ïa ki lama iong ba la teh ha Khliehriat ruh hajan ka ophis u Deputy Commissioner, ym pat shym la weng satia haduh mynta, ki dkhot jong kitei ki seng ki la ong ba kane ka jingteh lama ïong ka long ka dak ka jingsngewsih halor ka jingjia shah siat iap ki para doh para snam ha ki pulit Assam kaba la jia ha ka step sngi ba ar ha shnong Mukroh, West Jaiñtia Hills District.