Lehkmen lang u Bah Sniawbhalang Dhar bad ki khynnah ba duna dkhot met ha Ummulong

Jowai, Nohprah, 07: U Symbud Myntri Rangbah ka jylla Meghalaya, Bah Sniawbhalang Dhar, ha ka sngi Palei u la leh kmen lang bad ki briew kiba don jingduna ha ki dkhotmet bapher bapher ha ka jingrakhie ïa ka International Day of Person with Disability ha ka shnong Ummulong, West Jaiñtia Hills, Meghalaya.
ïa kane ka sngi kyrpang jong ki ba duna dkhot met ha shityllup ka pyrthei la pynlong da ka ophis jong ka District Social Welfare Officer West Jaintia Hill District ha ryngkat ka jingïatreilang bad ka People’s Welfare Development Society.
Lasdang ïa kane ka sngi da ki jingïakop ha ki jingñalehkai bapher bapher, kum ka jingïaknieh shuki (Musical chair), Ia knieh ball (passing the ball), jingïakop rwai (singing) ha ki kyrdan Junior bad Senior bad kumjuh ruh ka Health check up ïa baroh kiba wan ïashim bynta sha kane ka program.
Ha kane ka sngi la wan ïashim bynta da palat 100 ngut ki briew ba don jingduna dkhot met kiba hap hapoh ka Thadlaskeiñ C&RD Block.
ïa ka program ha ka shiteng sngi, la pynïaid da u ma Mutshwa Thabah (President PWDS) bad la ïoh ïa ka jingkren maitphang na ka kong Y Najiar, District Social Welfare Officer Jowai kaba la batai ïa ka jingmut jong kane ka sngi bad ka phang pdeng (Theme- Amplifying the leadership of person with disability for an inclusive and sustainable future) jong ka jingrakhie International Day of Disability mynta u snem.
Kiwei de ki ba ai jingkren ha kane ka sngi ki kynthup ïa Dr Lucky Rymbai na ka Ummulong CHC, I bah Iahmihoo Khyriem (resource person), I bah C.A Ram Kyndiah District Rehabilitation Centre Disability Affair, Civil Hospital Ialong bad ka kong D V Lyngdoh CEO Municipal kum I symbud kongsan.
Ha shwa, ka jingkren jong u Kongsan, loh ïa ka jingrwai na ki khynnah skul ka School of Mother Elizabeth for Visually Impairment Children, Nangbah WJHD. U ma Sniawbhalang Dhar, ha ka jingkren jong u, kum u kongsan ula ai khublei kyrpang ïa ki briew ba don jingduna dkhot met ha kane ka sngi burom jong ki. U la ai jingïaroh ïa ki ophisar jong ka tnad Social Welfare WJHD ki ba la trei shitom ban pynïoh ki lad jingïarap sha kine ki briew ba donkam ka jingïarap ba kyrpang.
Ula ai mynsiem bad pynshlur ïa baroh ki briew ba don jingduna dkhot met ban mih sha khmat bad ban don ka mynsiem ïakhun ha baroh ki bynta ka jingim katkum ka jinglah jong ki. U la ai ruh bun ki nuksa jong ki briew ki ba duna dkhot met ki ba la wanrah jingjop ha ka jingim jong ki ha ki bynta bapher bapher. U la kyrpad ruh ïa ki kmie ki kpa ban ym duh mynsien hynrei ban kyrshan ïa ki khun jong ki ha ki bynta bapher bapher jong ka jingïaid lynti ki khun jong ki.
U la ong ruh ba na ka liang ka sorkar, kin ialeh katba lah ban kyntiew ia ki lad jingiarap shi ki briew ba don jingduna dkhot met. La pynkut ia kane ka sngi da ka jingsam ïa ki khusnam ha ki jingïakop bapher bapher bad ka jingai sngewbha sha baroh ki ba wan sha kane ka prokram.