Lehkmen lang ka Lummawbah SC ba kiew 3rd Division, da ki song kyrpang ïoh ki nongïalehkai

Shillong, Nailar 31: Ka Lummawbah Sports & Cultural Club ha ka sngi Saitjaiñ ka la pynlong ia ka jingpynkup burom ia ki samla ialehkai U-20 kiba aireng ha ka lympung ialehkai jong ka SSA U-20 4th Division hadien ba ki la kiew kyrdan mynta sha ka 3rd Division.
Ha kane ka jingialang la wan ban sakhi lang naduh u Adviser jong u Myntri Rangbah ba dei ruh u MLA barim ka Mylliem Bah Hamlet Thangkhiew, u Vice President ka Shillong Sports Association ba dei ruh u President ka Nongkseh Sports Club Bah Daniel Thangkhiew, Rangbah Shnong ka Lummawbah Bah E Thangkhiew nalor ki nongkitkam ka klob, ki nongialehkai bad ki paidbah nongshong shnong.
Na ka liang u Kongsan Bah Hamlet u la ong ba ka jingjop jong ka Club ka dei nyngkong eh na ka jingshimkhia jong ki nongkitkam jong ka club khlem pyrkhat ia ka por bad ka bor. U ong ruh ba watla ka kynhun ka rem ha ka semi final hynrei ka dei pat ka jingjop ba ki la kiew na ka 4th Division sha ka 3rd Division.
“Phi la wanrah ka burom ia kawei pa kawei ka ïing ha Lummawbah,” ong u Bah Hamlet.
Nalorkata u ong ruh ba ka jingialehkai phutbol mynta kadei kaba kamai heh bha ha kaba ki la don bun bha ki samla ka jylla kiba ialehkai na Goa bad Punjab bad kiwei kiwei ki kamai da ki klur ha ka shi samoi.
“Mynshwa por ialehkai mangi ioh tang da u shaw la hun hynrei mynta pat ki nongialehkai kiba bit ki kamai da ki klur tyngka,” u la ong.
Ha kane ka sngi u Bah Hamlet u la ai ruh da ka song pisa kaba mar 5hajar tyngka sha baroh ki nongialehkai.
Haba kren ha kane ka sngi u President ka Nongkseh Sports Club Bah Daniel Thangkhiew u la kitbok ia ka club ba kan nang kiew arted na kawei ka division sha kawei pat.
“Da ka jingtrei borbah jong u Bah Hamlet ka Mylliem kan sa ioh ia ka madan kaba paka ha Mylliem Baniun bad u Myntri Rangbah ruh u la dep kular ia kata,” ong u Bah Daniel.
Shuh shuh u ong ba ki kloi ban ai madan ha Nongkseh ban praktis hangtei katba kim pat ioh madan.
Na ka liang u Bah R Khongwir President ka Club u la ong ba ki sngewkmen haduh katta katta ba da ka jingtrei shitom jong ki khynnah ialehkai ryngkat ki coach ki la lah ban kiew pat sha kawei ka kyrdan. “Ka thong jongngi ka long ban kiew na ka 4th Division sha ka 3rd Division bad kane ka la pynkmen shisha,” u la ong.
Katba u Rangbah Shnong ka Lummawbah, Bah E Thangkhiew u la pynpaw ka jingsngewnguh ia ki nongkyrshan jong ka Club bad ruh ki nongkitkam jong ka kiba la pyntyllun ia ka kam na ka por sha ka por.
U Rangbah Shnong u la ong ruh ba ka shnong kan pyrkhat ban pynkup burom ia ki samla pule ka shnong kiba leh bha ha ki jingpule jong ki.
Ha kane ka sngi ka Club ka la pynkup burom ruh ia ki nongkyrshan borbah kiba la don ka bynta kaba khraw ban tynrong ia ki prokram jong ka club. Ki la pynpaw ka jingsngewnguh ia ka Dorbar Shnong, nangta u Bah Hamlet Dohling, Bah Daniel Thangkhiew kumjuh ia ki dkhot barim bad ki nongshong shnong kiba ju noh kylluid mynsiem.