Jowai, Nohprah 07: Ka Seiñ Tyllilang Ñiamtre Ladthadlaboh mynta ka sngi 7 tarik u Nohprah kala lehkmen ïaka jingdap 25 snem ka jingïaid lynti haka jingïalang bala pynlong ïing Dorbar ka seng kaba don ha Mookyrdup, Ladthadlaboh, Jowai.
La wan ban sakhilang naduh u ma Lasky Rymbai, Deputy CEM-JHADC kum u kongsan, u ma O.H. Toi, President Seiñraij kum u Symbood Kongsan, u ma Puramon Kynjing, Dolloi Elaka Jowai, ki waheh wasian, ki longkmie ki longkpa bad ki khun samla.
Ïa ka jingïalang la pynïaid da u Refil Sari, Secretary Education STNL, la pynher ruh ïa ka lama da u ma Puramon Kynjing, Dolloi Elaka Jowai, nangta ka jingnguhblai nguhsyiem da u Kamnipaia Challam, Editor STNL, bad kiwei de kiba la ai jingkren shaphang ka Seiñ Tyllilang Ñiamtre.
U ma O.H.Toi, President Seiñraij Jowai haka jingkren ula pynkynmaw ïa ki kyrteng jong ki riew rangbah kiba la sdnag ïa kane ka seng bad kiba dei ruh ki nongïalam lynti, ula ong ruh kumba ki nongïalam ba hakhmat ka Seiñ Tyllilang Ñiamtre kila thrang bad angnud ban ïoh ïa ka ‘khnap thangbru’ ne ka Eco-Friendly Crematorium, u khmih lynti da ka jingtreilang baroh yn lah ban pyndep ïa kane ka kam ha kine ki sngi ban wan.
Katba u ma Lasky Rymbai, Deputy CEM-JHADC kum u kongsan ula pynpaw ka jingsngewnguh kaba khraw eh ïa kitei ki waheh wasian ne ki riew rangbah kiba la ïohi jngai ban seng ïa ka Seiñ Tyllilang Ñiamtre Ladthadlaboh na ka bynta ka lawei jong ki khun ki kti ka ñiamtre.
Ula pynsngew ruh ba kane ka long kawei na ki slem ai jinghikai ïa ki khun samla na ki shnong bad na ki Raij bapher bapher ba kin ïoh lad ban ïakynduh lang na ka bynta ban saiñdur ïa ka nongrim kata ban ieit ïa ka ñiam, ka jingieit Blei bad ka Riti ka Dustur.
Kiwei de kiba ai jingkren bad kitbok kitrwiang ïa ka Seiñ Tyllilang Ñiamtre Ladthadlaboh ki kynthup ïa u ma Rikut Parien, Ex-General Secretary STNL, u ma S.K.Lato, Founder Member bad u E.M.H. Passah, Adviser STNL.
Ha kane ka sngi u ma Lasky Rymbai ha ryngkat ki waheh wasian la plie paidbah ruh ïa u Mot Sahnam kum ka dak ban sngewburom ïa ki riew riew rangbah kiba long ki nongïalam ba hakhmat ka Seiñ Tyllilang Ñiamtre, haka juh ka por la don ruh ka jingpynkup burom ba kyrpang ïa ki.
