Leh noh ei ka jingnang jingstad lada ngim nang ban sumar ïa ka mei mariang: Shanborlang

Mawkyrwat, Jylliew 06: Ka kynhun jong ka Green Tech Foundation jong ka South West Khasi Hills District Division kum shibynta ban ïa snohktilang ha ka jingrakhe ïa ka sngi pynneh pynsah ïa ka mei mariang ne ka World Environment Day 2022 da ka mynsiem jong ka jingkitkhlieh ka la ïoh ban pynlong ïa ka prokram thungdieng ha kawei na ki jaka ba la khot ka Maw-chwa-kma kaba hap hapoh jong ka Shnong Wahsiej, South West Khasi Hills District.
Ha kane ka sngi watla kane ka kynhun ka dang don tang kyndiat ngut ki dkhot hynrei da ka mynsiem jong ka ieit ïa ka mei mariang ki la ïoh ban ïa mih ban leit sha kawei ka jaka ba la pynbeit ban thung ïa ki tynrai dieng bad ha kane ka sngi na ka liang ka kynhun ka la ïoh ban thung haduh 40 tynrai ki dieng ha kaba la ïa shimbynta shit rhem naduh ki samla shynrang bad kynthei.
Shwa ban sdang ïa ka jingthung dieng, u samla Shanborlang Lyngdoh Marshilong, Vice President ka Green Tech Foundation jong ka South West Khasi Hills District Division u la ai ka jingkren ba lyngkot ha kaba u la ong ba ki wan mynta ha kane ka jaka ba la pynbeit khnang ban rakhe ïa kane ka sngi jingpynneh pynsah ïa ka mei mariang namar kumba ka pyrthei baroh kawei ka sakhi ïa ka jingdonkam jong ka mei mariang ha kaba ka khot bad ka wer ïa ki khun samla ba kin leh ei ei na ka bynta ban pynneh pynsah ïa ki sawdong sawkun kiba ma ngi kum ki khun bynriew ngi donkam na ka por sha ka por.
U la ong ruh ba kum ki paidbah ki sakhi ba ha kine ki sngi kiba la dep ba ka jingshit na kawei ka por sha kawei pat ka la nangkiew, hynrei haba wad bniah halor kane ka bynta ka dei hi ka jingleh jong ngi hi namar ngi la pynjot dusmon ïa ka mei mariang da kaba ngi pom ïa ki dieng ki siej khlem da thew, bad khlem da pyrkhat na ka bynta ka pateng ka ban sa wan.
U la pynkynmaw ruh ïa kyntien kiba u Mahatma Gandhi u la ong, “Ka mei mariang ka don lut ïa kiei kiei baroh ki ban ai bynta ïa u briew kat ka jingdonkam jong u, hynrei kan nym lah ban pyndap ïa ka jinglalot jong u briew”. Namarkata, kum ka kynhun lyngba kane ka sngi ba kyrpang ka khot bad wer na ka bynta ki para samla jong ka dong ka thaiñ ba kin pyni ka nuksa ban ïeng ha la ki jong ki kjat da kaba leh ei ei na ka bynta ban pynneh pynsah ïa ka mei mariang bad ïa ki sawdong sawkun lyngba ka jingthung ïa ki dieng ha ki jaka ba ki briew ki la pynjot ne pom ïa ki.
“Ngi ki briew ngim lah da lei lei ban im khlem ka mariang, hynrei ka mariang ka lah ban im khlem ma ngi ki briew”, u la ong bad kum shibynta ban pyni ïa kaba bha tam to kin shim ïa ka kti kamon ka kti ka diang ban thung ïa ki tynrai dieng bad pynkhuid ruh ïa ki jaboh jabaiñ ïa kaba ki briew ki la pynsniew, ki la pynjaboh.
Namarkata, u la kyntu ïa ki para samla kiba don ha ki jingpule ba ka long leh noh ei ka jingnang jingstad jong ki lada kim nang pat ban sumar ïa ka mei mariang kaba ai lut ha ngi ïa kiei kiei baroh ba ngin im ha kane ka pyrthei bad ka long ruh kaba donkam ba ngin sngewthuh nyngkong ïa ka jingdonkam ba ngin pynneh pynsah ïa kiei ba ka mariang ka ai bad ma ngi ruh ngin im laitluid lait lan ym ha ka jingrhah hynrei ha ka jingtyngkai ne leh da kaba pyrkhat.
Ha kane ka sngi la synrang lang ruh da ki dkhot ne ki volunteers jong ka Green Tech Foundation jong ka South West Khasi Hills District Division.