Leh niam Shad Sukra ki Shong Bri ha ki shnong ki thaw ha EJHD ha shwa ban hiar sha ki jaka rep

Khliehriat, Jymmang 09 :Kiba bun ki shnong ha East Jaintia Hills District kiba la lah pyndep ïa ka jingleh niam Shad Sukra jong ki bad ki don ruh ki shnong kiba yn sa nang pyndep, ha kaba kane ka Shad Sukra ka dei ka jingleh niam tynrai kaba ki ju leh kum ka nguh blai ha shwa ba kin hiar sha ki jaka rep ban rep ban riang, ban bet ïa u symbai, ki Shong Bri ne ki shnong kiba hap hapoh ka Sieñ Raij Tuber kiba la dep ïa kane ka jingleh niam ki kynthup ka Seiñ Raij shnong Mutong,Pamra paithlu,Cham Cham,Lumshyrmit bad kiwei kiwei ki jaka.
U Myntri ka sorkar jylla,u bah Kyrmen Shylla,haba kren kum u kongsan ha ki katto katne ki jingleh niam Shad Sukra ha East Jaintia Hills District,u la pynpaw ka jingsngew kmen bad ai ka jingiaroh ïa ka Seiñ Raij Tuber bad kumjuh ruh ki Seiñ Raij Shnong jong ki shnong kiba la shim ïa kane ka bynta ba donkam eh ban pynneh pynsah ïa ka riti ka dustur kaba long ka jingleh niam kaba naduh u myn barim, u la ai mynsiem ïa ki Seiñ Raij ba kim dei satia ban pynduh pyndam ïa ki jingleh niam tynrai kiba naduh myn barim, u la ai ruh ka jingkhublei Shad Sukra ba suk ba kmen bad ka jingkitbok kitrwiang ïa ki khun ka Seiñ Raij ba kane ka Shad Sukra kan da wanrah ïa ki soh kiba thiang ha ka rep ka riang, ha ka bha ka miat jong baroh ki khun ki hajar ba kin ïa im bha im miat parum pareh.
Khyndiat shaphang ka jingleh niam Shad Sukra:Kane ka jingleh niam Shad Sukra ka dei kaba ki ju leh naduh ki por u men barim,ïa kane ki ju sdang ban leh naduh ka ka taïew ba khatduh jong u bnai lber haduh u bnai ïaiong man la u snem bad la sdang ïa kane da ka Seiñ Raij Tuber ha kaba la sdang shwa da ka kñia Ryngkaw nangta pat ha ka sngi Hat (sngi ïew) lane ka Kyllaw la pyndep ïa ka kñia ryngkaw ha kaba baroh ki khun ki hajar jong ka Seiñ Raij Tuber kim dei ban leit trei leit ktah ha ka sngi Kyllaw,u Lyngdoh,ka Lyngdoh,ki Wasan baroh ka dei ka sngi sum sngi sait jong ki bad ha kane ka sngi Kyllaw ha ka ka por shiteng synia mynmiet u Lyngdoh bad ki Wasan ha ka por kumba 1 baje mynmiet ki pyndep ïa ka kñia Shathoh,ïa kane ka kñia ki ju leh ha Iung Blai Lyngdoh ha Tuberkmai Shnong,hadien kane u Lyngdoh u shim ïa u symbai bad u bet ha lyngkha kum ka dak ban pyndep shwa u Lyngdoh ïa ka jingbet symbai bad ha ka por mynsngi ha kaba ïa ka kñia ruh lah dep ka jingbet symbai ruh lah dep kin sa pynlong ïa ka shnad Sukra,ki khun shnong Bri shnong Khyndaw (kaba nut ki khun ki hajar kito ki bym dei na shnong Tuber) ki ju khot da ki Sein Raij Shnong,kine ki Sein Raij Shnong ki lah ban leh ia kane ka leh niam bad ka shad Sukra dei ynda la dep leh shwa u Lyngdoh jong ka Sein Riaj Tuber ha ka Iung blai.
Kumba ka long mynta u snem u Lyngdoh u sdang ia ka leh niam ïa ka kñia ka khriam ha ka 4 tarik da ka kñia ryngkaw, ha ka 5 tarik pat ka dei ka sngi sum sngi sait bad ha ka 6 tarik la sdang ïa ka shad sukra da kaba ki wan bad poi lut baroh ki khun ki raiot jong ka Raij Tber bad hadien kane, u Lyngdoh u pynbna ba lah biang ka por ban bet noh ïa ki symbai sha ki jaka rep bad ha kane ka sngi la pyndep ruh ïa ka knia Shad Thoh Pastieh ha Tuberkmai shnong bad u la pynhap symbai.
Kane ka Shad Pastieh pat ka mut ba u Ryngkaw hadien ba la dep leh niam ha ka kñia ka khriam, lada ka pyni ïa ka ka dak kaba bha ba miat hangta kin sa pynlong ïa kane ka shad pastieh kaba ki ju shad da ka waitlam bad ka stieh ha kaba ki ju rah lang ruh ïa ka wait pom blang bad hadien kane kin sa hiar sha la ki jong ki lyngkha ki jaka rep ban sdang ïa ka rep ka riang ban noh ïa ki symbai.