Leh mardor ïa kaba donkam ban lait jing saphriang khñiang jingpang na u ñiut

Shillong, Ïaiong 20: Ka Ïingkashari Meghalaya High Court kala bthah ïa ka Sorkar Jylla bad ka Jaiñtia Hills Autonomous District Council (JHADC) ban leh eiei noh mardor ha kaban weng ïa ki jingeh na ka jingkynton u ñiut ha sor Jowai ban pynthikna ba kan nym mih ka jingsaphriang ki khniang jingpang.
“Ki bor Sorkar bad ka District Council ki dei ban ïakynduh bad ai jingmut ïa ki lad ki lynti kumno ban wengnoh ïa ka jingeh khnang ban lah lum bad pynkhuid noh ïa u ñiut na Sor Jowai, ban pynthikna ba kan nym mih ka jingsa phriang ki khniang jingpang khamtam ki khniang ba saphriang na ka um (water borne dissease) namar ka jingslap khlem sangeh ha kine ki sngi bala leit noh” ong ka Ïingkashari.
Haba shong bishar ïa ka Public Interest Litigation (PIL) bala mudui da ka Synjuk ki Waheh Shnong, Jowai hynne ka sngi balang, ka Ïingkashari kala ong “Ngi kyrmen skehm ba kan don ka jingshimkhia mardor ïa kane ka kam da ki bor ba halor”.
Ka Ïingkashari ka sngew ruh ba ka Sorkar Jylla, ha kiba bun ki khep, ka ju thet kti bad ong ba kam don bynta eiei ruh em ha ki kam pynkhuid ïa ki shnong ki thaw.
“Ka pynkhuslai shibun ba ki ñiut kila nang kynton ha kawei na ki jaka sor jong ka Jylla, kaba lah ruh ban lam sha ka jingmih ki khniang jingpang bad ka khlam” kala ong.
Ka Ïingkashari kala hukum ruh ba ka Khasi Students Union jong ka Shnong Moopyut lem bad u Rangbah Shnong ka Moopyut bad ki hynriew tylli kiwei ki shnong ki dei ban pynlong mamla lang ha kane ka mukotduma.
Kane kala mih hadien ba ka Jowai Municipal Board (JMB) ha ka aplikeshon bala ai sha Ïingkashari kala pynpaw ba ha u bnai Lber 2021, ka Sengbhalang ha ka kyrteng jong ka Khasi Students Union ka Moopyut lem bad 6 tylli ki Shnong ba kynthup ïa ka Pynthor Langtein, Umsalang, Shhen Pyrsit, Moopyut Madan Tyrpait, Moosakhia bad Sohmynting – kila pyrshang ban khnag jubor ïa ka jaka theh ñiut ha Mynkjai.
“Watla kala don ka jingiasoi soskular ban theh shipor ïa ki ñiut ha kane ka jaka (Mynkjai) ba long tang lai bnai, hynrei namar ka jingbym pat lah ithuh ïa kiwei pat ki jaka theh ñiut da ka Task orce bala thaw da ka Tnad Urban Afairs ka Sorkar Jylla lem bad ka JMB, ka jinglum ïa ki ñiut kala sangeh noh” ong ka JMB.
Ha ka jingbishar, ka Jaintia Hills Autonomous District Council, kala kam ba ba khlem pat ïoh pdiang satia ïa ka copy jong ka jingujor.
Namar kane, ka Ïingkashari kala bthah ïa ka District Council ban shim ïa ka copy jong kane ka hukum bad ka copy jong ka jingujor kaba dei ban ai sha ki mamla ba dang pynrung thymmai haba pyntip ruh ba kane ka jingbishar kan long biang ha ka 22 tarik u Ïaiong.