Nongpoh, Nohprah 01: Ki nongïalam shnong ka Umñiangbyrnai Parila ryngkat ka jingsynran lang ka seng RBYWO mynta ka sngi kila phah syndon da ka jingthoh sha ophis ka District Medical Health Officer (DMHO) ban pan jingshai halor ka rukom thungkam ïaki samla ha Maternity and Child Health Hospital ka ban sa plie shen ha katei ka shnong.
Ha kane ka sngi naka liang ki nongïalam shnong ka Umñiangbyrnai Parila hapoh ka jingïalam u Bah Pynshngain Marbaniang, Rangbah shnong, Bah Robinroy Sakra, Secretary shnong, ryngkat ka synranlang u Bah Ban Kharnaior, President ka RBYWO, ki thmu ban leit ïakren bad ban kynduh bad ka DMHO ban pynshai halor ka rukom thep kam ïaki samla jong ka shnong haki kyrdan Grade IV hynrei namar ka jingbym don ka DMHO naka liang ka shnong kala ioh ban buh tang ka jingthoh.
Haba kren sha ki lad pathai khubor naka liang u Bah Pynshngaiñ Marbaniang u la ong ba kum ka shnong ka dap da ka jingsngewkhia ba bun naki samla katei ka shnong kim don jingtip eiei halor ka jingthung kam ha katei ka hospital bad wat u MLA ka thaiñ u ïaid lait ïaki bor shnong watla ka don ka jingïasoi soskular haki por ba mynshuwa hadien ba ka shnong kala ai sngewbha ïaka jaka, namar ka jingthung kam ha katei ka shnong ka dei kaba la shu jied bad thung tang kat ïa kiba mon.
Shuh shuh u la ong ruh ba kumba long mynta ka bor shnong kam tip eiei halor ka thungkam thungjam ha katei ka jaka sumar bad la shu leh lyndet ïaki bor pynïaid shnong, bad kum ka shnong ka kwah ba ka ophis ka DMHO ka dei ban ai jingshai halor kane ka bynta bad lada kam long kumta naka liang ki bor shnong kim banse ban khang pyrshah ban nym ailad ban plie paidbah ïa katei ka Hospital, namar ka jingïakut ka long ba ki kam hi ba lah ban trei ki trai shnong dei ban ai shaki lait noh kiwei kiwei kiba kim lah satia ban trei katkum ki kyrdan thungkam.
Naka liang u bah Ban Kharnaior pat kum u President ka RBYWO u la ong ba naka liang ka seng ka ioh jingtip ba ka thungkam ka tnad ka koit ka khiah ha Ri-Bhoi ka long kaba lymmuh lymmaiñ, namar ba kam don shuh ka jingthungkam katkum ka lynti hynrei la thungkam beit na iing shetja bad kum ka seng ka dap da ka jingsngewkhia ba kata ka hok thungkam kam don shuh bad kaba sngewsih shuh shuh ka long wat ka shnong ruh kam don jingtip eiei namar kumba long mynta ki don ki briew kiba rung ba mih ha katei ka jaka sumar ki bym ithuh ithaw khlem jingtip ki bor shnong.
