Leh donbor ka JAC ha Majai, da ki taïew khang kam khaïi da kaba ai daw ‘shna surok’

Shillong, Naitung, 28: Ka kynhun ki samla rangbah ka thaiñ Sohra ki la kynnoh ba ka don eiei ha lyndet ka jingkhang ka Joint Action Committee (JAC) jong ka Hima Sohra Exporters’ and Importers’ Association (HSE&IA) bad ka New Local Majai Exporters’ Forum (NLMEF) ïa ka kam khaïi pateng sha Bangladesh lyngba ka Majai Land Custom Station mynta la jan dap lai taïew da kaba ai daw ban moramot ïa ka surok na Wah Japuh shaduh Zero Point Bholaganj LCS naduh ka 14 tarik u Naitung, 2022 khlem da buh por haduh lano yn pyndep.
Ka JAC ka la phah da ka jingthoh sha u SDO ka Sohra Civil Sub-division ha kaba la soi da u Bah C Rajee kum u Chairman bad u Bah E Majaw, Secretary ha ka 11 tarik u Naitung, 2022 bad phah kopi sha u Syiem ka Hima Sohra, u MLA ka Shella, Executive Engineer PWD, u CEM KHADC bad MDC ka Shella ha kaba ka la pyntip ba ka kane ka surok ka la buh jingma ïa ki paidbah namar ka la sniew palat bad donkam ban moramot naduh katei ka tarik tad haduh ba kan da biang.
Ka jingleit hiar ka kynhun ki samla ha ka jingïalam u Bah Wellborn Bynnud, Bah B Lamin, u Bah Vickey L Mawnai bad kiwei kiwei pat ka la long hadien ka jingïoh jingujor na ki nongñiah kali kiba la sahkut lai taïew bad ka jingkit bad kumjuh na ki nongkhaïi. Kaba thamula ka long ba ki nongñiah kali ne ki nongkhaïi kim don jingtip ïa kane bad ki shah ïalam bakla ba khang ka ïew ne da kumne kumtai.
Haba wad jingtip na ka ophis u Superintendent ka Bholaganj LCS la ïoh jingtip ba kam don jingkhang satia hynrei ki kali kim ïaid bad kim lah ban kynthoh eiei halor ka jingkhang ïa ka ïaid ka ïeng ki kali. Ka kynhun ki samla rangbah ki la ïakynduh khlem poi pyrkhat ïa u Syiem Khynnah ka Hima Sohra, u Pa’iem Marremdor Syiem kumjuh ïa u Myntri L Kynta kiba dang wan jurip ïa ka jingmoramot surok ha ki bynta jaka ka Hima kaba dei ban rung sha Bangladesh.
Ki samla rangbah ki la kyntu ïa ki bor Hima ban pyndep kloi ïa ka jingmoramot ha katei ka bynta ha kaba ki la ïoh ka jingkular ba yn pyndep noh shen. Ha ka jingjurip pat ïa ka surok ba la kam da ka JAC ban moramot pynban kam shym la don satia khyndiat ruh ka dak ban shna pynbha ïa ka bad la lap ba ar tylli ki trok ki la sahkut ha kawei ka bynta na ka jingsniew palat ka surok bad wanrah jingdheng kali kaba jur ha katei ka jaka.
Ym tang katta ka leit ka wan ki paidbah ruh ka la shah ktah nalor ki kali kiba ïeng bad ka jingkit ha ki surok la jan lai taïew. Kaba lyngngoh pat ka long ba wat hapdeng ka jingkhang ïa ki trok ban ïaid pynban ki don pat ki trok jong ki nongïalam na kitei ki synjuk kiba leit theh maw ha ka jaka ïeng kali ka Hima Sohra.
Ki nongñiah kali bad ki nongkhaïi ki pynpaw ka jingeh ba kim ïoh ïaid ban pynpoi ïa u maw uba ki la kit ha ki trok ban leit theh sha Bangladesh. “Ngi don ki Challan bad ki kot ki sla kiba biang ban leit theh maw hynrei balei ki khang ïa ngi bad mynta lai taïew ngi shu ïeng hajuh, ngim don bai bam shuh !”, ki la ong. Ki la don ruh napdeng kitei ki kali kiba la pynhap noh ïa u mawshun ba ki kit ha shi lynter lynti na ka bynta ban ïoh phai noh sha la ïing.
U Bah Wellborn Bynnud, haba kren ha ki lad pathai khubor, u la pynpaw ka jinglyngngoh ba kumno ka JAC ka ong ban moramot surok katba ki dak ki shin kim paw eiei. “Ka don kaei kaei ha lyndet kane ka rukom pynsangeh ïa ki kali kaba la wanrah jingeh ïa ki paidbah ym tang ïa ki nongñiah kali ne nongkhaïi”, u la ong da kaba bynrap ba kiba don Challan ki lah ban leit theh maw bad ki bym don pat kin hap hi ban ïeng hangtei.
Haba pynpaw ban ïakren ïa kane ka kam bad u SDO ka Sohra Civil Sub-division namar ka ktah ruh ïa ka ïoh ka kot ki paidbah bad kumjuh ïa ka jingpynmih pisa ïa ka Sorkar Jylla, u la ong, “ngi dawa ban plie noh mardor ïa ka khaïi pateng lyngba ka Majai LCS namar ka ktah ïa ki paidbah bad ka JAC kam dei ban leh ïa ki kam kiba ktah ïa ki paidbah la ki dei ki nongkhaïi ne ki nongñiah kali.”