Leh bym suidñiew ka kompani shna surok, byrngem ïakhih ka SSSS Warsanlyngdoh Area

Mawkyrwat, ‘Nailur, 02: Ka Synjuk Seng Samla Shnong Warsan Lyngdoh Area (SSSSWLA) ka pynpaw ka jingsngewbitar kaba khraw ïa ka jingleh bym suidñiew, ka jingleh beiñ, ka jingbym kheiñ briew jong ka kompani ba ïoh ban pyntrei ïa ka Intermediate Road Nongstoiñ-Wahkaji.
Ha ka kyrwoh khubor la ong ba naduh ba kane ka kompany ka la sdang ban tih khyndew, bun bah ki kali na ka thaiñ Warsanlyngdoh, Phlangdiloiñ, Mariem Area, ki la shem shitom haduh katta katta ha kaba bun ki kali ki shu lait da kaba hap ban ïa khynñiat, ban shu ïa thep maw hi bad don bun bah ki kali ba hap ban sahmiet bad hap ban shu tan da ki lwei pat ki kali.
“Kane ka jingtrei khlem da pyrkhat ïa u paitbah da kane kompany ka la wanrah ka jingeh kaba khraw ïa ki paitbah nongleit nongwan bad khamtam eh kiba pang ba shitom bad kiba armet”, ong ka kyrwoh. Ki la kdew ruh ba kane ka surok ba la sniew palat pud ka dei naduh Demnar, Mariem ter haduh Lum Kyllai Longsngun.
Namarkata, ka Synjuk ka kyrpad ïa ka kompani, ïa ka PWD (R) bad ïa ka Deputy Commissioner, South West Khasi Hills District ban pynbha kloi ïa kane ka Surok.
Ha kawei pat ka liang, ka Synjuk ka maham ruh ba lada ki bor ba dei peit kim shimkhia kloi kum ka synjuk kan hap ban shim da kiwei pat ki sien jam ban pynlong da ki program ïa khih.
Kane la long ka kyrwoh khubor na u bah Thrangbor Wanniang, General Secretary ka Synjuk Seng Samla Shnong Warsan Lyngdoh Area (SSSSWLA) bad na u bah Zandy Myrthong, President ka Synjuk Seng Samla Shnong Warsan Lyngdoh Area (SSSSWLA).