Leh burom kyrpang ka YBCC ïa ka samla Banrihun kaba la khur takma ksiar ha ka National Arm Wrestling C’ship 2025

Mawkyrwat, Naitung 11: Kum ka dak jong ka jingkyrshan bad ai mynsiem ïa ka Samla Banrihun Lyngdoh Marshilong kawei na ki samla ba don ha ka bynta jong ka jingïakop ïakhun-kti ne Arm-Wrestling, mynta ka sngi ka 11 tarik u ‘Naitung, 2025, ka Mawkyrwat Block Congress Committee lyngba ka Youth Block Congress Committee (YBCC) ka la ïoh ban leit pynkup burom ha ïing sah jong ka samla Banrihun kaba la khur ar tylli ki takma ksiar ha ka jingïakop ïa khun kti.
Lah ban kdew ba ka jingjop jong ka ha kane ka jingïakop ka dei ha ka National Arm-Wrestling Championship 2025 kaba hapoh ka Aegis of People’s Arm-Wrestling Federation of India ba la pynlong da ka Kerala Arm-Wrestling Association ha Kerala.
Kiba la ai jingkren ha kane ka sngi ki la ai mynsiem bad ai jingïaroh na ka bynta ka samla Banrihun Lyngdoh Marshilong kaba la poi sha ka thong ka jingjop ha ka jingïakop ïa khun kti da kaba ka la wanrah nam lyngba ka jingkhur haduh ar tylli ki takma ksiar (ha ka jingïakop ïakhun kti da ka kti ka mon bad ka kti ka diang). Kumta, ki la ai jingïaroh ryngkat ka jingkyntu ïa kane ka samla ba kan nangtrei shitom shuh shuh ha ki por ban dang wan khnang ba kan nang kiew na kawei ka kyrdan sha kawei pat haduh ka International Level ruh.
“Haba ka don ha ka jingïaleh, kam dei ban buh ïa ka mynsiem jong ka jingduh jingkyrmen wat hapdeng ki jingeh ba ka ka ïakynduh hynrei ka dei ban buh ïa ka mynsiem jong ka jingïaleh ryngkat ka thong ha ka jingim khnang ba ka jingthmu jong ka ban poi sha kiwei pat ki kyrdan kan urlong lyngba ka jingïaleh da ka mynsiem jong ka jingsngewrit ha ki por baroh”, ong ki nongkren.
Kiba la ïadonlang bad kiba la ai ki jingkren ha kane ka sngi jong ka jingleit pynkup burom ki long naduh u bah Kynpham V Kharlyngdoh, President jong ka District Congress Committee (DCC), u bah Andrias Kharkongngor, Secretary jong ka Mawkyrwat Block Congress Committee (MBCC), u bah Ribrensing Pariong, President jong ka Marshilong Congress Primary Unit, u bah Kynsailang Lyngdoh, President jong ka Youth Block Congress Committee (YBCC), Mawkyrwat Block, u bah Gilbert Thongni, Myntri Shnong Marshilong lem bad kiwei de.
Ha ka jingkren jong ka samla Banrihun Lyngdoh Marshilong ka la ong ba ka jingjop jong ka ha kane ka jingïakop ïa khun kti kam dei eh ka jingjop jong ka shimet hynrei ka dei lyngba ka jingaimynsiem naduh na ïing na sem, ka shnong ka thaw, ka distrik bad kumjuh ruh na ki para ba ïalehkai lang. Ka ong kumtei namar hapdeng ki jingeh ba ka ïa kynduh khamtam eh ka liang ka pisa tyngka lymda ymdon ka jingïarap lem na kiwei, kan nym lah ban poi haduh kane ka kyrdan jong ka jingjop.
“Nyngkong nga ai nguh ïa U Blei, ba U la ri la U la sumar ha ki por baroh bad Uba la pynïoh ha nga ïa ka met ba koit ba khiah ba ngan ïoh ka lad ban pyndep ïa kaba nga la thmu watla ha kaba nyngkong nga khlem mut ban leit ïashimbynta. Kawei de nga pynpaw ka jingkhublei ïa baroh kiba ka don bynta ban kyrshan ïa ka la ka long lyngba ka pisa tyngka bad kumjuh ruh kiba ai mynsiem lyngba ki jingduwai khamtam eh ïa u bah Aldous Wanniang, President Arm-Wrestling jong ka South West Khasi Hills District”, ong ka samla Banrihun.