Leh burom kyrpang ka Dorbar Shnong Rangthong ïa ka Kong Victorealness Syiemlieh

Mawkyrwat, ‘Naiwieng, 26: Ka long kaei kaei ka jingaimynsiem na ka bynta kawei ka longkmie na ka shnong Rangthong namar ha kine ki khyndiat bnai ka la ïoh ban pdiang burom ïa kawei na ki khusnam ba la tip kum ka ‘National Florence Nightingale Award 2021’ ha kaba ka longkmie kong Victorealness Syiemlieh ka la ïoh ïa kane ka khusnam.
Namarkata, kum ka dak jong ka jingaimynsiem bad burom kyrpang, ka Dorbar Shnong Rangthong kaba hap hapoh jong ka Hima Maharam Syiemship, South West Khasi Hills District ka la pynkup burom kyrpang ïa ka kong Victorealness Syiemlieh ha ka jingïalang ba la pynlong ha shnong Rangthong
Lah ban kdew ba lyngba ka jingïoh pdiang jong ka kong Victorealness Syiemlieh ïa ka ‘National Florence Nightingale Award 2021’ na ka kti jong ka President ka ri India, ka Droepadi Murmu ha ka 7 tarik u Naiwieng ha Rashtrapati Bhawan ha Nongbah Delhi ka la long ruh kum kawei na ki jingaimynsiem ïa kiwei de ki para longkmie ne ki para samla ba kin don ïa kum kane ka thong ba kin thmu ban poi khnang ba kan long ka burom ïa ka lawei jong ki.
Kum ban shu kdew ka kong Victorealness Syiemlieh kadei ruh ka kyrtong ka seng congress ka ban sa iakhun ïa ka MLA Election ha u 2023 na ka Ranikor Constituency bad ka jingïoh pdiang jong ka ïa katei ka khusnam ka dei halor ka jinglah jong ka ban ai ïa ka jingshakri ïa ki briew ha ka koit ka khiah ne ha ka imlang sahlang.
Ka kong Victorelness Syiemlieh kaba dei ka nurse ba la shongthait na ka kam ba ka la bat kum ka Assistant Director jong ki nurse hapoh ka Directorate of Health Service (DHS), Shillong bad ka dei ruh ka longkmie kaba ju ïa kit ïa bha ha ka imlang sahlang bad kaba la long teng ka nongkitkam ka ha ki kama jong ka Balang.
Ha kane ka sngi nalor ka jingpynkup burom ka shnong, la ïoh ruh ban pynkup burom ïa ka kong Victorealness da ki seng bapher bapher kiba kynthup naduh ka RCCSA, VDP, RVWWO bad ka Village Organisation kiba la pynpaw ïa ka jingsngew burom bad sngewnguh bad ai ruh ka jingkitbok kitrwiang ïa kane ka longkmie.
Ha kane ka sngi pynkup burom la pynwai ïa ka jingïalang da ka jingrwai pynwai na u Kitborlang Nongrem, Myntri shnong Rangthong bad jingdwai pynwai na ka kong Ninety Milian Shangdiar.