Jowai, Nailur 26: Ka Welcome Gayang Memorial School, Jowai ha kane ka 24 tarik u Nailur kala pynlong ïa ka jingleh burom ïa ka sngi ba kyrpang jong ki kmie ki kpa kaba la tip kum ka ‘Parents Day’.
Hashwa kane la don ka jingïalang ba lyngkot ha kaba la wan ban sakhi lang da ki kmie ki kpa jong ki khynnah skul, katba na ka liang u Rev. Mynried Kyndiah ula ai ka jingduwai bad ka jingkren pdiang sngewbha da i Rev. Dr. Wakiru Kyndiah, ïa ki kyntien kyntu kynpham shaphang kane ka sngi burom la ïoh na ka kong B. W. Nongbri, Secretary School Managing Committee jong ka Welcome Gayang Memorial School.
Ka kong B.W. Nongbriha kala ai ka jingïaroh ïa ki kmie ki kpa jong ki khynnad skul kila la pyni shisha ïa ka mynsiem jong ka jingïatreilang bad ki bor pynïaid jong ka skul, ka kyrmenskhem ba kane ka jingïatreilang kan wanrah ïa ka bha ka miat bad ka lawei ba phyrnai jong ki khynnah skul.
Na ka liang ki khynnah skul ruh kila ïashim bynta lang ban pyni ïala ki sap ki phong jong ki ha ki rynsan lyngba ki jingshad ki jingrwai bad kiwei kiwei de kiba pynsngew tynnad bad pynkmen ïa ki kmie ki kpa jong ki. Katba ïa ki prokram la pynkut da ka jingduwai na u Rev. Dr. E.R.Tongper.
