Leh burom ka St. Joseph Academy of Nursing ïa ki 27 ngut ki samla kiba la pyndep ïa ka Graduate GNM

Nongpoh, Nailur 30: Ka St Joseph Academy of Nursing, kaba don ha Umtrew Ri-Bhoi District mynta ka sngi ka la pynkup burom ïa 27 ngut ki samla pule kiba dei ki kynhun ba nyngkong na katei ka shlem pule, kiba la pyndep ïa ka Graduate haka General Nursing and Midwifery (GNM) jong u snem 2021-24 haka jingïalang kaba ishongkun (Graduation Day) ha Meba-ai Resort Umtrew.
Ha katei ka sngi ka jingpynkup burom ïa ki samla pule, u Dr Ricky AJ Syngkon MP ka Lok Sabha na Shillong u la shim bynta kum u kongsan, haka jingdonlang u Dr Aman War u ba dei u Director barim ka Health and Services (MI) kum u symbud kongsan, u Bah AL Hek Advisor ka St Joseph Academy of Nursing Umtrew, ka Kong Ibanrilin Ranee Principal, Kong Ibalari Siangshai Managing Director bad kiwei kiwei lem bad ki samla pule, ki nonghikai bad ki kmie ki kpa.
Na ka liang ki bor pynïaid katei ka shlem pule ki la aiti ruh da ki Momentous sha baroh 27 ngut ki samla kiba la pyndep ïa ka GNM Graduate, kum ka dak ka jingburom bad ka jinglehkmen ïa ka jingjop ka jong ki.
Haba kren ha kane ka sngi na ka liang u Dr Ricky AJ Syngkon u la ai ka jingïaroh ïa ka St Joseph Academy of Nursing kaba la ieng kum kawei na ki shlem pule ban ai jinghikai ïa ki samla kum ki Nurse ne kita ki nongsumar, bad kane ka sngi ka dei ka sngi ba sah jingkynmaw haka jingim jong ki samla pule kiba la pyndep ïa ka GNM kum ka kynhun ba nyngkong tam jong katei ka shlem pule kiba la ïoh kheit ïa u soh ka jingjop shuwa ba kin bteng ïa ki jingpule ba kham shalor lane ki leit ban trei sha ki hospital bapher bapher.
U la kyntu ruh ïa kitei ki samla pule ba ka ktien ba bha ka dei kaba kongsan ba bun ki nongpang ki koit nalor ka jingdih ïa ki dawai, namar teng teng tang ka jinglong jong ki nurse, ka jingjem ka ktien ba kren ka pynkoit ïa bun ki jingpang jong ki nongpang.
“Ha kano kano ka ja ka sumar kaba phi leit, laka long ka jaka ba bun briew, ka jaka ba kham kyndong, ka jaka ba long sor, trei hok ïa ka kam, aiti lut ban shakri ïa ki paidbah bad phin nang phyrnai haka jingim jong phi, namar kane ka kam ka dei ka kam kaba shlur, bad tip ba ka jingnang jingstad kam don jingkut” la ong u Dr Syngkon.
U la ong ruh ba shibun ki jingeh kin wan haka jingim bad ka kam ba phi trei, hynrei ka jingim ba khlem ki jingeh, ka jingim ba khlem ka jingtynjuh kam dei ka jingim, kumta leit sha ka pyrthei da ka jingshlur, trei bad shakri hok ïa ka kam kumba phi la dep ban pyntbit bad ngeit skhem lyngba ki kam jong phi kan wanrah ka jingkylla haka imlang ka sahlang bad khantam haka koit ka khiah jong ki paidbah, u la bynrap.