Shillong, Nohprah 12: Ka Raid Laban Sports, Social and Cultural Organisation (RLSSCO) lyngba ki dkhot jong ka seng ha ka jingïatreilang bad ka Garo Welfare Society (GWS) ha ka sngi Thohdieng ki la leit ban buh syntiew hakhmat jong u dur mot jong u (L) PaPa-Togan Nengminja Sangma.
Kane ka jingbuh syntiew kaba dei ruh ka lyngkhuh sngi khlad ba 153 snem jong u, la leit ban leh burom ïa ka dur mot hakhmat ka Warrior Memorial Garden kaba don ha Kench’s Trace (Raid Laban), Shillong.
Ïa kane ka jingleh burom la sdang da ka jingduwai ba la ïalam da u Rev. Pastor P. Marak ba la pynbud da ka jingbuh syntiew kum ka dak ka jingkynmaw burom ïa une u riewkhraw ba ïaleh laitluid bad hadien pat la pynbud sa kiwei kiwei pat ki prokram.
Ha kane ka sngi u MLA bad uba dei ruh u Myntri ka sorkar jylla u Sanbor Shullai uba dei u president jong ka organization u la ai ka jingkren pdiang bad u la pynpaw ruh ka jingai khublei naduh dohnud ïa baroh ki dkhot kiba don ha kane ka jingleh burom.
