Nongpoh, Rymphang 15: Hadien ar sngi ba ka Apex Council ka MCA Meghalaya Cricket Association, kala pynbna ïa ki nongkitkam ba thymmai, ba u Bah Rayonald Kharkamni u la shah jied kum u Honorary Secretary ka Meghalaya Cricket Association, ka Ri Bhoi District Cricket Association mynta ka sngi ka la pynkup burom ïa une u Rangbah ha madan ïalehkai ka RBDCA ha Pahamsning, Nongkhrah.
Kum ban pynkynmaw, u Bah Rayonald Kharkamni, u dei u President ka RBDCA, uba la trei shitom shitom naduh u snem 2006 ban kyntiew ïa ki kam ïalehkai Cricket ha Ri Bhoi bad ha ka jylla. Tang hapoh ki 20 tylli ki snem kiba u la shakri u la lah ban kyntiew shibun ïa ka kam ïalehkai Cricket hapoh ka Ri Bhoi kum ka madan ïalehkai cricket kaba la ïa ryngkat dor bad ki madan kiba shabar ka jylla kaba don ha Phamsning, Nongkhrah, ka Jaka Kilan met lane ka indoor Pitch ha madan kurkalang lem bad kiwei kiwei.
Haba leh burom ïa u Bah Rayonald Kharkamni la sakhi lang ruh da ka jingdon lang u Bah Ferdinald Kharkamni Vice President RBDCA, u Bah Micheal Kharhunai General Secretary lem bad kiwei kiwei ki dkhot, ki Coach bad ki khynnah ïalehkai kiba dang don hapdeng ka jingshah hikai.
Lyngba jong kane ka snig, ka RBDCA ka la pynlong ruh ïaka open trial lane ka jingjied ïaki heprit ïalehkai cricket haka rta kaba 16 snem shapoh jong ki shynrang bad kiba hapoh ka rta kaba 15 snem jong ki kynthei ki ban mihkhmat na RiBhoi sha ka District Level Inter District Cricket Tournament ka ban sa pynlong daka MCA ha Nongbah Shillong.
