Jowai, Jymmang 31: Ka skul R.C. Eve Secondary School Mihmyntdu na Thadlaskein Block ha kane ka 30 tarik kala leh burom ïa ka ‘World Menstrual Hygiene Day 2022’ da kaba pynlong ïa ka prokram ai jinghikai ba kyrpang ïa ki khynnah pule jong ka ktei ka skul. La ïathuh ba ka jingrakhe ïa ka ‘World Menstrual Hygiene Day’ ka long shi bynta ban ai mynsiem ïa ki kynthei ba kim mih shakhmat ban ïa phylliew jingmut shaphang ka jingkoit jingkhiah jong ki naduh ki khynnah, ki samla bad ki longkmie.
Na ka liang ka kong Tina Lakiang, Secretary School Managing Committee R.C. Eve Secondary School, Mihmyntdu haba ai jingkren kala kyntu ïa baroh ba kin tip shaphang kane ka sngi ba kyrpang kaba long kawei na ki lad jingmyntoi khamtam ïa ki khynnah kiba dang heh dang san ha ka long briew man briew.
Ka kong F. Pohshna, Asst. Teacher R.C. Eve Secondary School haba kren kum ka riew shemphang kala ai jingbatai ba ka jingkhuid jingsuba ka long kaba donkam eh ha ka jingim briew kaba manla ka sngi bad kala batia ruh shaphang ki la jingkylla ha ka rynïeng ryngïot jong ki kynthei.
Ha kane ka sngi la ai jinghikai ïa ki khynnah skul shaphang ka rukom kylla ha ka doh ka phat jong ki kynthei da kaba pyni lyngba ki dur kiba lah ban ïarap ïa ki khynnah skul ban ïoh jingtip kham bniah shuh shuh.
