Jowai, Nailar 08: Ka Mihmyntdu R.C. EVE Secondary School West Jaiñtia Hills District mynta ka sngi kala pynkup burom ïa ki rangïalehkai phutbol jong ka kiba la wan rah burom ïa ka skul kum ka lahduh haka Under-14 jong ka State Level Subroto Mukherjee Cup-2022 kaba dang shu dep pynlong ha nongbah Shillong.
Lyngba kane ka jingjop ka skul kan sa ïoh ban leit mih khmat ïa ka jylla ha ka kyrdan Sub-Junior Boys Under-14 sha ka ’61st Subroto Cup Football Tournament 2022′ ha nongbah Delhi ka ban sdang naduh ka 6 tarik Nailur haduh 13 Risaw 2022.
Kine ki rangïalehkai jong ka skul kila don haduh 25 ngut bad mynta ka sngi la pynlong khnang ïa ka jingïalang pynkup burom ba kyrpang ïa ki ha ïing skul jong ka Mihmyntdu RC EVE Secondary School, ha kaba u ma Wailadmiki Shylla ula long kum u kongsan jong kane ka sngi.
Kiwei de kiba la wan ban ïadonlang ki kynthup naduh u Rev. Fr. HilariousLamare, Parish Priest Jowai, Fr. Fedrick Synnah Chairman Catholic Church Mihmyntdu, ka kong Tina Lakiang Head Teacher Cum Secretary, MDC ma Octomewot Lamin, u local MDC ma Brightstar Chyrmang, ki nonghikai, ki Sister bad kiwei de kiba la shah khot sngewbha.
Kum ka dak ban kyrshan ïa kane ka skul ha kaba ïadei bad ka jingpynkhreh jong ka ban leit mihkhmat sha ka sha Nongbah Delhi ban ïakhun ïa kane ka luympung na ka liang u ma Wailad ula kular ban ïarap pisa haduh 50 hajar tyngka.
Ha ka juh ka por u kyntu ïa kitei ki rangïalehkai jong ka skul, ba ka rta jong ki ka dang biang bha ban jam shakhmat bad ban pynliet jingmut bha ha ka kam ïalehkai, khnang ba kin long shisha kita ki khlur ba paw jong ka jylla hi baroh kawei.
Ula ong ruh ba kane ka jingjop jong ki ha ka State Level ka la long ka burom kaba khraw eh ïa ka Ri-Lum Jaiñtia bad khamtam eh ïa ka skul bad u kyrmen ba kane ka kynhun hapoh ka jong jingïalam jong ki Coach lyngba ka tnad sports jong ka jylla kan wanrah ïa ka jingjop kumjuh ha Nongbha Delhi.
Baroh kiba ai jingkren ha kane ka sngi kila pynpaw ka jingsngew kmen bad ai khublei ïa kitei ki kynnah skul kiba don shisha ïa ka sap ka phong ïalehkai naduh ba ki dang ïakhun ha ka District Level haduh ban da poi sha ka lympung ha Delhi.
