Shillong, Jylliew 13: Ka HYC Nongkohlew Unit ha ka 12 tarik mynta u bnai hapoh ka jingialanm u Lurshai Kharhujon bad Kitboklang Jyrwa ki la pynlong ïa ka Tur Shaphrang Educational Award bad ka jingsam shatri sha ki 30 ngut ki khynnah skul, ha phyllaw jong ka Don Bosco Secondary School Nongkohlew.
Ïa ka Tur Shaphrang Educational Award la ai sha u Shondri Lyngdoh Nonglait (72%) u Richard Lyngdoh Nonglait (81%) bad u Werson Nongsiej (81.33%) kiba la leh bha ha ka eksam SSLC ba dang shu dep.
La pynïaid ia katei ka Jingialang da u General Secretary Bah Kitboklang Jyrwa uba la shim ruh ïa ka bynta ban pdiang sngewbha ia ki Nonghikai jong ka Skul kumjuh ruh ïa ki nongialam ka HYC Mawlai circle kiba la iadon ryngkat ha kane ka sngi.
Haba ai jingkren na u Adviser jong ka unit Bah Starwell Wanniang, u la ong Ka jingpynlong jong ka unit ia katei ka Prokram, ka long shi bynta ban ai mynsiem bad ban pynshlur ïa ki samla pule jong ka shnong ba kin ïabeh shakhmat shaphrang ha ki jingpule, kumjuh ruh ka jingsam ïa kine ki shatri ka long ban ïada na u slap bad na ka jingshit jong ka Sngi.
I Miss Delinia Passi haba ai jingkren i la ong ba kum i Head Teacher i pynpaw ka jingaikhublei ïa ka HYC ba kan ithuh kyrpang ïa kine ki 3ngut ngut ki toppers ka SSLC na ka skul jong i, lyngba ka Tur shaphrang Educational Award.
I la ong ba kine ki khynnah kim dei ki khynnah ba ïoh lad ban leit tuition kum kiwei pat ki khynnah kiba sah kham sha sor, hynrei kidei ki khynnah nongkyndong hynrei kiba trei shitom, ki la ïoh distinction ha ki subject kum ha ka Khasi, Health Education, Science & Mathematics.
U President ka Mawlai Circle, u Bah Donboklang Kharlyngdoh haba ai jingkren u pynpaw ka jingaikhublei ïa ka Nongkohlew unit ba ka lah ban pynlong ia kum kane ka prokram, kane ka long shi bynta na kawei ka mat treikam jong ka HYC, kata ban ïa “Kyntiew”.
“Kum ka Jaidbynriew rit paid ngi donkam ban ia “Kyntiew”, ia btin Lynti para ma ngi ha ki bynta kiba pher ba pher ym tang ha ka pule puthi”, u la ong.
U la sot ruh ia kawei ka jingkren kaba ong ” ka pule puthi kadei ka atiar bah kaba khraw kaba phi lah ban pyndonkam ban pynkylla ia ka Pyrthei”.
U la hikai bad ai mynsiem ïa ki khynnah ba ha kine ki sngi ba mynta donkam bha ïa ka jingang jingstad, namar lada ngi nang ngi stad ngin nym shah ñiew beiñ hano hano ruh,
U la ai mynsiem bad pynshlur ia kine ki 3 ngut ki samla, ba phi dei ban mih ma phi napoh kane ka shnong Nongkohlew ban long ki Doctor ki Engineer ne ki Civil servant ha kawei ka Sngi, da kaba phin trei shitom arshah laishah nangne shakhmat.
Ha kane ka Sngi la ioh ruh ban sam shatri sha 30 ngut ki khynnah da u Shanbor Marwein Organising secretary HYC Mawlai circle bad ïa ka jingpynkup burom la sam da u Bah Donboklang Kharlyngdoh kum u Kongsan.
Kane ka long ka kyrwoh ba la phah da u Publicity Secretary ka seng u Bah Donboklang Khriam.
