Leh burom ka BAM ïa ki 43 ngut ki samla kiba pyndep ïa ka jingshah hikai ‘Security’

Jowai, Lber, 30: Ka Bouncer Association of Meghalaya (BAM) Jaiñtia Hills ha ka sngi Saitjaiñ ka la pynkup burom ïa ki 43 ngut ki samla kiba la pyndep ïa ki jingshah hikai ban long kum ki ‘Security Guard’ na ka kynhun kaba lai haduh kaba phra ha kaba ki don 32 ngut ki kynthei bad 11 ngut ki shynrang.
Ha ka jingïalang pynkup burom ba la pynlong ha Mynkjai surok Dawki ba la pynïaid da u President ka BAM-JH ma Yoosar Kynjing, ha ka jingdon lang u SI. Gemy Nongsiej (i/c DCRB, WJH Jowai, u Dolloi ka Elaka Jowai ma Puramon Kynjing uba dei ruh u trai jaka jong katei ka jaka ai Training, nalor ki dkhot ka Association lem bad ki samla ki la dep shah hikai.
Ha ka jingkren lamphrang hashwa ban sdang jong ka prokram u President ka BAM-JH ma Yoosar Kynjing ula ïathuh ïa kane ka Association la seng hapoh ka Ri-lum Jaiñtia ha ka 14 tarik u September, 2020 bad mynta ka la kynjoh noh sha ka jingshakri kaba san snem.
Shuh shuh u ong ka jingwan jong kane ka Bouncers Association of Meghalaya (BAM) hapoh ka District kan ai mynsiem shibun eh ïa ki khun samla jong ka Ri-Lum Jaiñtai ha ka liang ka rukom pynïoh kam (Security).
Naka liang u ma Yoosar ula pynsngew ka jingthmu ba kongsan eh ban seng ïa kane ka BAM-JH, ka long shi bynta ban ïada ïa ki khun samla ba kin lait na ki jingdih pynbuaid kiba bun jait, kum u nongïalam ula pynsngew ba ka ophis jong ka BAM-JH ka long kaba plie ha baroh shi taïew lait ha ka sngi U Blei, kino kinoki khun samla kiba donkam jingïarap ka ophis ka kloi ba ïarap ïa ki katkum ka jinglah ka bor.
Kitei ki samla 43 ngut ki la ïoh jinghikai naduh ki rukom ki lan met bad ki rukom ai jingpahara ha ki bynta bapher bapher, ha ka juh ka por kin long ruh ki nongïarap ba ha khmat eh ban wanrah ïa ka jingshongsuk shong shngaiñ hapoh ki shnong ki thaw.
Ha kane ka sngi la sam bad pynithuh ïa kitei ki samla ba la dep shah hikai da ki Syrnod jong ka Association ha kaba kin ïoh lad ban apply ïa kino kino ki kam ki jam bad napdeng kine yn jied ban long kum ki dkhot (official) jong ka BAM-JH. Ula pyntip ba ka Association ka kloi ban pdiang ïa kito ki khynnah kiba sah khunswet bad wat ïa kito kiba duna ha ki dkhot met ban kin ïoh ka jingshah hikai (Training).
Na ka liang u kongsan bah Gemy Nongsiej ha ka jingkren ula ai ka jingïaroh ba kyrpang eh ïa u nongseng jong ka Association uba long ruh u President jong ka ma Yoosar Kynjing uba don shisha ka mynsiem trei shitom ban wanrah kum kane ka kynhun ban pynïoh kam ïa ki khun samla bad uba kloi ruh ban ïarap ïa ki samla kiba don ïa ka sap ka phong ha kino kino ki bynta.
Ula ai mynsiem ïa kitei ki samla ba kin don ïa ka burom ka akor, kiba trei shitom bad kiba burom ïa ki Uniform ba ki phong ha ka por ba don duty, ula pynsngew da ka jingdon ka BAM-JH ka la long ka jingïarap kaba hajan eh ïa ka tnad pulit jong ka District. Ula kyntu ïa ki smala ba kin ïakhun kumjuh ïa ki kam sorkar hadien ba la pyndep ïa ka Training.
La pynshong shit shuh shuh ïa kane ka sngi da ki jingshad tynrai ba bun jait, ka jingpyni dohksah da ka samla Sawakani Lakiang kaba jop ha ka MS India national Body Building & Fitness Championship bad ka Zumba Exercise na kitei ki samla ba la dep shah hikai.