Leh burom ka Army Public School ïa u khynnah skul barim u ba pass ïa ka Civil Service Exam

Shillong, Jylliew :Sa kawei pat ka jingkmen ka ba ka Army Public School, Shillong ka la ïoh ban mad ka long hadien ba u khynnah pule barim jong kane ka skul u Ankur Das u ba dei jong ka batch (2012-13) u la lah ban pass ïa ka UPSC Service Examination ha ka kyrdan ka ba 52 hapoh ka ri India baroh kawei.
Kumta ruh ha ka 14 tarik mynta u bnai na ka liang ka skul ka la pynlong ïa ka prokram pynkup burom ka ba kyrpang halor kane ka jingjop jong une u khynnah skul barim.Na ka liang ka Deputy Commissioner ka East Khasi Hills, ka ba dei ruh ka khynnah skul barim jong ka Army Public School Shillong, I Kong Isawanda Laloo IAS I la pynkup burom ïa u Ankur Das ha kane ka prokram ha ka jingïadon lang u Brigadier Syed Ali Usman, SC, Chairman ka Army Public School Shillong bad BGS, 101 Area, Shillong bad u Col NK Bairathi, SO 1 EDN, 101Area, Shillong bad kiwei kiwei.
Ha ka jingkren ha ka jingïadon lang ki khynnah skul, I Kong Isawanda Laloo I la pynkynmaw ïa kito ki sngi ki snem ha ka por ba I dang pule hapoh Army Public School Shillong.Nalor kata I la kren ruh halor ka jingdonkam ban pynkup bor ïa lade lyngba ka pule puthi khnang ban lah ban ïakhun pyrshah ïa ki jingeh jong kane ka juk ka ba mynta.
Ha kajuh ka por I la aijingmut ruh hapdeng ki khynnah ba kin bat ïa ka burom jong ka longbriew manbriew bad ruh ban ym pynlehnoei ïa ka por ne ïa ka kabu hynrei ban trei minot na ka bynta ban wanrah ïa ka burom bad ka jingsarong ïa ka imlang ka sahlang.
Na ka liang u Ankur Das ha ka jingkren u la ban halor ka jingdonkam ban pynneh bad ban don ïa ka jingshaniah ha ka jinglah ka ba da lade hi. Kane ka jingïalang ka wanrah ruh ïa ka jingkyrmen ba ha ki snem ki ban dang wan kin nang mih shuh shuh ki khubor jong ka jingjop lyngba ki khynnah pule jong kane ka skul.