Leh aïu u Bah Paul ïa ka ishu Them metor ha ka por ba u bat kum u Myntri Urban Affairs

Shillong, Naitung 19 : Ka ishu pynkynriah ïa ki briew ba sah ha Iew Themmawlong sha Mawbah, Mawprem ka la wanrah pynban ïa ka thma ktien kaba jur bha hapdeng u MDC ka Jaïaw Mawprem, Bah Paul Lyngdoh bad ki nongïalam jong u MLA ka Shillong West, Bah Mohendro Rapsang.
Katei ka jingkawang ktieh ka la mih shisngi hadien ba u MDC ka thaiñ Bah Paul Lyngdoh u la kynnoh ba une u MLA ha ki por ba mynshwa u la kular ban wanrah da ka jaka pule ki doktor ha katei ka thaiñ hynrei mynta pat u thmu ban wanrah da ki briew kiba sah ha Iew Themmawlong.
Haba kren bad ki lad pathai khubor, u Bah Mike Pakyntein, uwei na ki nongïalam ba hakhmat eh jong u MLA ka Shillong West u la ong ba kitei ki jingkren ki long tang ban ïalam bakla ïa ki paidbah namar ba la jan ka elekshon. “Nga kwah ban kylli shwa ïa u Bah Paul Lyngdoh kaei kaba u la leh ha ka por ba u bat kum u Myntri ka tnad Urban Affairs ka sorkar jylla ïa katei ka jaka ha Iew Themmawlong. Bad kum u Myntri jong ka tnad Urban u la kular ban wanrah ïa ka flyover bad kular ruh ban wanrah ïa ki jingtei kiba heh ha katei ka jaka kaban don ka jaka pynieng kali ban pynkylluid ïa ka sor hynrei ki khlem urlong satia. Kumta ban kynthoh ïa u MLA jongngi ba u kwah ban wanrah ïa kitei ki briew ha Mawbah, ka long kaei kaei kaba bakla,” u la ong.
Shuh shuh u la ong ba ha ka sngi Ba-ar ma u, ki nongïalam shnong kumjuh u MLA Bah Mohendro Rapsang ki la leit ban kynduh ïa u Symbud Myntri Rangbah ka jylla ban pynpaw ba ki ieng pyrshah jur ïa ka jingthmu jong ka sorkar ban wanrah ïa kitei ki briew na Iew Themmawlong ha Mawbah.
“Ha katei ka sngi, ngi la rai ban pyrshah beit bad na ka liang u Symbud Rangbah ruh u la pynshai ba katei kam pat dei ka rai kaba khatduh namar ki dang bun kiban ïaid shakhmat. Na ka liang ka sorkar kumba ïathuh u Symbud Myntri Rangbah, ki thmu ban phiah khyndiat khyndiat la ka jong ïa kitei ki briew ym ban wanrah baroh 342 iing hapoh Mawbah. Ngi sngewkmen shi katdei ba u Symbud Myntri Rangbah u la ong ba nangne shakhmat kin dang don bun ki jingkynduh ban pynbeit halor kitei ki ishu,” bynrap biang u Bah Mike.
Utei u rangbah u la ong ruh ba watla kattei ki shah kynthoh hynrei ki paidbah ki dei ban tip ba utei u MLA watla u shong saw snem ha ka Liang Pyrshah hynrei ki kam pynroi ki la bun bad kot da ki klur tyngka. U ong ruh ba ki paidbah ki dei ban kylli na u MDC kiei ki jingtei lane ki jingshna kiba u la pynsah kynmaw na ka bynta ki nongshong shnong jong ka constituency ha ki 15 snem ba u long kum u nongmihkhmat.
U ong ruh ba ka iing ba duk ba don ha Kyrbom ki paidbah kidei ban tip ba wat ka iing ba duk ba don ha katei ka thaiñ kadei ba wanrah da i Kong Ampareen Lyngdoh ha ka por ba i bat kum ka Myntri Urban Affairs. “Hynrei une u MLA jongngi watla u khlem don ha ka sorkar nalor ba wan lyngshop ka khlam COVID pynban u la wanrah haduh 2klur tam ka projek na ka bynta ban pynitynnad ïa ka shnong Mawprem khamtam ïa ka Kyrbom Point bad mynta ka Shillong West kan dei ka constituency kaba nyngkong eh ha Meghalaya ba ïa ki jingshai ha ka constituency la pyndait da ki LED ha kaba ka kam ka dang ïaid hadien ba ki tubelight, ki CFL ki la jah lut,” u la bynrap shuh shuh.
U ong ruh ba katkum ka jingïakut lada u duh utei u LED Light, ki kompeni ba pyntrei mardor kin wan pyndait noh da kiwei pat ha ki arsnem.