Shillong, Lber 30: Ki Pulit ha ka sngi Saitjaiñ ki la pyntip ba ki la kem ïa u Laden Ch Sangma na ki sakhi sabur ba la ïohlum halor ka jingshah kynnoh ba u dei uba donkti ban siat ïap ïa u Denybirth G Momin uba dei u nonghikai Science bad Maths jong ka Resubelpara Higher Secondary School ha khmat jong ki bahaïing hasem bad ki khun ba dang rit ha u snem 2012.
Ki Pulit ki la ïathuh shwa ba u Laden un pynïasoh bad ka seng lehnoh bad ka seng Garo National Liberation Army (GNLA) u dei uba ju im bylla kamai jakpoh ban die ïa ki wait Achik, ki Shield bad kiwei kiwei ki tiar.
U Laden Ch. Sangma u la dei na ka kynhun ba nyngkong jong ka GNLA bad u la ïoh ka jingshah hikai ha Durama Hills, Garo Hills. Ha u snem 2012, u la shah thung kum u Area Commander jong ka Northern Zone, la ïathuh ki pulit.
La ong ba ka jingpynïasoh jong u sha ka GNLA dei lyngba ka jingïakynduh ïa u Sohan D. Shira uba dei u nongïalam barim jong ka GNLA bad u dkhot barim ka ANVC uba dei na ka shnong Nengmandalgre.
Ka khubor ka ïathuh ruh ba u la kynduh ïa u Lt. Sohan D. Shira bad u la ïalong paralok bha bad u bad da ka jingai jingmut jong u Sohan D. Shira, u Laden bad kiwei pat ki 15 ngut kiba la shah kem ki la pynïasoh bad ka GNLA hapoh ka jingïalam jong u Sohan D. Shira.
Kum ban shu pyntip hangne, ba u Laden u la shah kem ha ki Pulit ha ka 27 tarik mynta u bnai.
Ki Pulit ki ladep ban ujor ejahar ha Mendipathar Police Station ha u snem 2012 bad ka jingtohkit halor kane ka jingjia ka dang ïaid shakhmat.
