Nongpoh, Jylliew 17: Kumba ha kine ki khyndiat sngi ki ar tylli ki Thuk thuk ki la shah tuh ha ki runar na Mawlai Nongkwar ha Shillong ba ki runar ki la tuh ïa kitei ki thuk thuk bad ïa kine ki thuk thuk la lap noh na Ri Bhoi District.
Kum ban pynkynmaw, kine ki ar tylli ki thuk thuk ba kynthup ïa ka Yamaha R15 kaba don ïa u number ML 10 C 4295 bad kawei pat ka ka Thuk thuk Bajaj Pulsar ML 05 M 1313 ki la shah tuh noh ha ki runar bym tip kyrteng ha ka shiteng synñia jong ka 15 tarik u Jylliew 2023 na Mawlai Nongkwar bad tang ha ka janmiet jong ka 15 tarik u Jylliew 2023 la lap noh ïa katei ka thukthuk ba don ïa u number ML 10 C 4295 na Warmawsaw ha Ri Bhoi ba la tip ba ki runar ki la ïaid lyngba ka surok National Highway-6 bad ïaid lyngba ka surok Umling-Patharkhmah sha Warmawsaw.
Halor kane ka jingshah tuh kitei ki ar tylli ki thukthuk la dep ruh ban ujor ejehar ha Mawlai Police Station ban thwet ïa ki runar ba don kti wat la kawei ka la lap na Warmawsaw bad ïa katei ka wei pat ka thuk thuk kaba don ïa u number ML 05 M 1313 la lap noh na Umtrew ba la buhrieh da ki runar hawei ka jaka ba long khlaw bad dei namar ba la lap ki paidbah la pyntip noh sha ki bor pulit ka Umiam ban wan shimti ïa katei ka thuk thuk.
Shuh shuh, la ong ruh ba ki bor pulit ka Umiam tang hadien ba lalap ïa kane ka thuk thuk ki la pyntip noh sha ki trai ban wan shimti ïa katei ka thukthuk ba la lap na Umtrew bad ka jingtohkit halor kane ka jingshah tuh ki thuk thuk ka dang ïaid shakhmat ban ioh kem ïa ki runar kiba don kti ha kane ka kam tuh ïa ki thukthuk, ong ka tyllong khubor na ki Pulit ka Ri Bhoi.
