Khliehriat, Nailar 19: Ki pulit ka East Jaiñtia Hills ha ka sngi nyngkong ki la lap ïa kawei ka metïap kaba per halor kawei ka wah ba la khot kum ka Wah Shka Larsiang hapoh ka shnong Lakyrsiang, East Jaiñtia Hills District.
Kane ka la wan hadien ba pulit ki la ïoh jingtip lyngba u president ka VDP jong ka shnong Lamyrsiang u Bah Jemrif War hadien ba ki la wan poi mardor sha katei ka jaka.
Na ka liang u SI u Bah O Nongtdu bad ki staff ki la pynlong ïa ka jingtohkit bniah ha katei ka jaka ha kaba la ïoh jingtip ba une u briew uba la khlad noh u dei uba kyrteng u Nestoss Pala 75 snem rta uba dei na ka shnong Lamyrsiang, EJH.
Na ka liang kiba haïing hasem jong une u rangbah ki suba jur ba kane ka jingjia ka la wan jia ha ka por ba u dang jam lyngba ïa katei ka wah hadien ba u la wanphai na ka dukan kyiad bad hab shapoh kane ka wah bad ïap jyllop.
Hadien ba la pyndep ïa ki jingdonkam baroh na ka liang kiba haïing hasem jong une u lanot ki la kyrpad ïa u ADM ka Khliehriat ban pyllait na ka jingleh ïa ka post mortem bad ban aiti noh ïa ka met sha ki bahaïing hasem khnang ba kin pyndep ïa ka jinglehniam kaba khatduh.
