Nongpoh, Rymphang 12: Ar ngut ki nongthohdieng mynta ka sngi ki la lap ïa ka metiap jong uwei u rangbah uba la sdien ha u tyllai phasi ha khlaw Reserved Forest haka shnong Umling ha Ri-Bhoi District haduh ba ka met kala pyut lut bad sah satang ka shynrong bad ka ki jaiñ bala sdien ha u tyllai phasi bala antad ruh ba utei u rangbah u la sdien phasi la bun sngi.
Tang hadien ba la lap ïa katei ka met, kitei ki nongthohdieng ki la pyntip mar mar sha ki bor shnong ka Umling, kiba la ïathuh pat sha ki pulit ka Nongpoh. Ki pulit ki la hiar sha ka jaka ban pynlong ïa ka jingtohkit katkum ki kyndon aiñ bad ban lum ïa ki sakhi sabut.
Hadien ka jingtohkit, ki pulit ki la ithuh ïa utei u rangbah kum u Shyam Limbu, 70 snem ka rta, uba shu wan sahkai bad ki bahaïing ha Umling.
La ïathuh ruh ba ki bahaïing kim shym la pynpaw kano kano ka jingtharai sniew halor ka jingïap jong u. Kumta, hadien ba la pyndep ïa ki kyndon katkum ka aiñ, la pynlait noh ïa ka post-mortem bad aiti ïa ka met sha ki bahaïing ban pyndep ïa ka jinglehniam ba khatduh.
