Lap ki saiantis ïa u jait dohthli ba thymmai na ka wahduid ha khap maw Iewmawlong

Nongpoh, Nohprah 16 : Ka kynhun jong ki 6 ngut ki saiantis kynthup ruh uwei u samla naka shnong Iewmawlong kila lap sa uwei pat u jait dohthli thymmai u ba don ruh ka khlieh kum u bseiñ na kawei ka wahduid haka shnong Iewmawlong ha Ri-Bhoi District kaba dei ruh kawei naki jingjop ban dang bteng ban rung haka thup ki jait dohkha kiba don haka ri India.
Ïa utei u dohthli la jer kyrteng kum u Channa Bhoi ban ai nam ïaki jaitbynriew Bhoi bad ïa kane ka jingshem bad jinglap ïa utei u jait dohthli ba thymmai la pynrung ruh haka jingthoh ka Ichthyology & Herpetology, bala pynmih da ka American Society of Ichthyologists and Herpetologists.
U tei u jait dohkha la ithuh ruh da ka kynhun jong ki nongwadbñiah bala lamkhmat da u Jayasimhan Praveenraj, Nallathambi Moulitharan, u samla Aristone M. Ryndongsngi na Ri-Bhoi, Tejas Thackeray, Ravi Shanthy Naveen bad Annam Pavan Kumar bad la lum ïa ki nuksa ha ka por ba jurip ha u snem 2021 na kawei ka wah duid kaba jyndong kaba tuid lyngba ki khap mawsiang hajan Nongpoh.
Katkum ki nongwad bñiah u Kha Channa Bhoi u dei ruh u ba wan naka kynhun Gachua jong ki jaitdohkha ba doh ka khlieh kum ki bseiñ kiba kham lap bha haki thaiñ Eastern Himalayan bad utei u jait dohkha u don ruh ka rong kaba kham pher bala khleh lang ka rong blue bad rongkpei, rong iong bad ki dak thoh iong.
Lyngba kane ka jinglap ïa utei u jait dohkha ki jait dohkha Channa kila kiew sha ka 26 haka ri India bad ka Meghalaya kadei nakiwei naki jaka ba bun bha kine ki jait dohkha thli kiba don ruh ka khlieh kum u bseiñ bad ki saiantis lem bad ki nongwad bñiah kila pyntip ruh ba bun naki wahduid haki lum ka jylla Meghalaya ki dang dei ki bym pat da lah ban pule bad wadbñiah bha bad lah ruh ban ong ba ki dang don shibun ki jaitdohkha ki ban sa dang lap haki por ban dang wan.