Nongpoh, Nailur 27: Hadien 3 sngi ba uwei u Heprit ba dang 9 snem ka rta la kynnoh ba u la shah rah bor ha ki runar kiba ym lah ban ithuh dur khmat ha ka por 6 baje ei ei janmiet ha ka janmiet jong ka 25 tarik u Nailur 2025 na ka Shnong Bir ha ka thaiñ Umsning, kane ka la dang pyntieng pynsyier ïa ki para khap shnong hadien ba ki briew shnong na Rtiang hynnin ka janmiet ki la lap ïa ki briew kiba phylla bad la suba ba ki dei ki riew sniew.
Haba kren sha ki lad pathai khubor, u Rangbah Shnong ka Rtiang, Mawroad Road u Bah Raplang Marshiang, u la ïathuh ba ki don ki riew rangbah na ka Shnong Rtiang ki la lap ïa ki briew ba long phylla ha kaba ki la pyrshang ban ïa kren, hynrei kitei ki briew ki la phet bad uwei u la kynthih sha khlaw bad lap sa tang ki dienjat ba u la phet sha khlaw.
U la ong ruh ba ki briew shnong kiba la lap ïa kine ki briew ki la pyrshang ban pyrta briew ban ïa beh ïa kitei ki riewsniew, hynrei namar ba la sdang dum ki la sangeh noh ban beh ïa ki, da ka jingtieng ba ioh ki dang don bun ha ka kynhun kiba rieh sha khlaw bad ki la shu ap noh haduh ban da poi bun ki nongshong shnong.
U la ïathuh ruh ba ki nongshong shnong ba la poi ha katei ka jaka, ki la ïa pyrshang ban wad ïa kitei ki briew sha katei ka khlaw, hynrei kim lap dien shuh ïa ki bad lap sa tang ki dak ba ki rung sha katei ka khlaw. Ka shnong Bir bad ka Shnong Rtiang ka jngai tang kumba 2 km ei ei, u la ong.
Shuh shuh, u la ïathuh ruh ba na ka liang ka bor shnong ka la pyntip mardor sha ki bor pulit ka Umsning kiba la wan poi mardor sha katei ka jaka ban pynlong ïa ka jingtohkit na ka bynta ban lap ksai ïa kitei ki runar bad ha kajuh ka por ruh ki bor pulit ki la kyrpad ïa ki paidbah nongshong shnong ba kin pyntip mardor lada lap ïa ki briew ba phylla khnang ba kin lah ban leh ïa kaba don kam katkum ki lynt ka aiñ.
Halor kane ka jingjia, na ka ling ka bor shnong, ki VDP bad ki bor Pulit k la rai ruh ban pynlong da ka jingïawad paidbah ha kitei ki bynta jong ka khlaw khnang ban lap ksai ïa kitei ki suba riew sniew kiba lah ban don bynta ha ki kam sniew ha katei ka thaiñ.
