Nongpoh, Nailar 20: Haka jingbteng ka jingtohkit ki pulit ïaki 5 ngut ki nongïalam bad ki dkhot ka HNYM, kiba la shah kem halor ka jingkynnoh dawa pisa naki nongñiah kali kamai, ki pulit kila iathuh ba ki la lap ïaki bank transaction ne ka jingphah pisa jong ki nongñiah kali kamai sha ki account shimet jong kitei ki nongïalam seng bala shah kem ryngkat ki dur bad ki video bala ioh ring haka ban pynthikna ïakatei ka jingkynnoh ba ki dawa pisa naki nongñiah kali tourist.
Kum ban shu kdew hangne ki 5 ngut ki nongïalam bad ki dkhot ka seng HNYM kiba la shah kem haki pulit hynnin ka miet ki kynthup ïa u Ricky Tangsang na Sajer Nongpoh, u Sparly Syngkli naka shnong Nongkhrah, u Donboklang Kharbani naka shnong Mawroh, u Aiborlang Marbaniang na Umjarasi bad u Krius Pariong na Pahamri-oh bad ki pulit kila lap ruh ba u Ricky Tangsang lem bad ka kynhun jong u kidei kiba ju donkti ha kiba bun ki kam tuh bad ki kam dawa pisa bad shah pynngat mukotduma ha Nongpoh, Umiam bad Laban Police Station.
