Shillong, Ïaïong 12: Ki pulit ki la ïathuh ba ha ka janmiet jong ka 30 tarik u bnai Lber, ki nongshong shnong jong ka shnong Umsyiem (EKH) ki la aiti noh ïa uwei u briew uba la shu shang makia bad ïaid khlem tip shano u mut ban leit, ha shilynter jong ka surokbah NH-40 Dawki (EKH), sha ki shipai ïada pud ki Border Security Force (BSF) kiba ap pahara hapoh Border Out Post (BOP) Umsyiem.
Ka khubor ki pulit ka ïathuh shuh shuh ba hadien kane ka jingjia, utei u briew u la pynithuh pat ïalade kum u Md. Fakira Khan uba na nongbah Delhi bad ïathuh ba ha ka 29 tarik u Lber, uwei na ki paralok jong u, uba la pynithuh ïalade uba kyrteng u Raju, u la wan ïalam ïa u sha ka thaiñ khappud jong ka East Khasi Hills da kaba ai daw ban leit jngoh ïa ka jaka sah jong u kaba ha jylla Assam, u la thok pat ka pisa kumba T. 7,000/- bad u la phet krad ha ryngkat lang bad ki tiar ki tar jong u, ba kynthup ïa u Aadhaar card, PAN card bad ka mobile phone.
