Lap ki nongrung krem na kylleng ki ri sa ïa ka krem kaba wan ba 7 ka jingjrong ha ri India

Shillong, Nohprah 12 : Ki nongwan rung krem na kylleng ki ri ka pyrthei kiba la wan rung krem ha kane ka jylla Meghalaya naduh ka 6 tarik Naiwieng haduh ka 1 tarik Nohprah 2022 ki la lap sa kawei ka krem kaba wan ba hynniew ka jingjrong ha India kaba kyrteng ka Krem Rynjang (Ret Dung Khur) ha East Jaintia Hills namar mynta u snem la lah ban pyndep ïa ka jingrung ia kane ka krem bad jingthew jingwoh na ka 11558 m sha ka 16,328m.
Kane ka jingrung krem mynta u snem kaba la tip “ The 2022 ‘Caving in the Abode of the Clouds Expedition’ ka long kaba shongshit bha hadien ka jingpynwit jong ka khlam COVID-19 namar ki la don 19 ngut kiba wan ban ïashim bynta kiba dei na UK, Ireland, Austria, Netherlands, United States, na kiwei ki jylla ka ri India, bad ki dkhot jongka Meghalaya Adventurers’ Association (MAA). Ka dei ruh ka jingdap 30 snem ka jingrung krem ha kane ka jylla kata 100 snem hadien ka jingwan rung ne lap ïa ka krem Siju Dobhakol ha u snem 1922.
Hashwa kane ki 9 ngut ki dkhot ba wan rung krem ki la leit shwa ban bteng ka jingrung bad jingthew jingwoh ïa ki krem kiba don ha ka shnong Jalaphet, East Jaintia Hills. Hangne ka kynhun rung krem ka la lah ban rung 5 tylli ki krem bad 3 tylli ki dei kiba dang thymmai kiba kynthup ïa ka Krem Poh Bhang ha ka shong Poh Bhang bad Krem Mo Ryho ha ka shnong Kairang. ïa ka krem Pohbhang la lah ban rung haduh 220 m bad Krem Mo Ryho la rung haduh 323 m.
Ka kynhun rung krem ka kham pynlut por bha ban pyndep ïa ka jingrung krem ha Muallian, East Jaintia HIlls ha kaba ki la lap ïa kawei ka Krem ba thymmai ka Krem ETB bad bteng ruh ban rung ïa ka Krem Rynjang (Ret Dung Khur bad Krem Pynnoh Um Sngad. ïa ka krem Pynnoh Um Sngad la lah ban rung bad thew bad woh na ka 4131m ha u 2020 sha ka 5295 mynta u snem.La lap ba ka don ka jingïasoh ka krem kaba thymmai ka Krem ETB kaba la lah ban pyndep ka jingrung sha ka 7138 m bad mynta kane ka krem Poh Um Sngad ETB ka la wan ha ka kyrdan ba 9 ka jingjrong ha India.
Ka jingrung bad thew ïa ka Krem Pynnoh Umsngad ETB bad ka Krem Rynjang ka dang ïai bteng bad ka don ka jingngeit ba kine kin sa iasnoh lang. Kumta lada ki iasnoh lang ha kaba kut bad lada ki iasoh lang kine kin long ki krem kiba jrong tam ha India ki ban pynkheiñ noh ïa ka record jongka Krem Liat Prah-Um Im Labit kaba ïoh bat ïa kane ka nam kat haduh mynta.
Ka rukom rung krem mynta u snem ka long kaba kham eh namar kiba bun ki krem ki dei kiba hap hiar beit ha ka jingjylliew kaba 85 m nalor shaduh trai. Lada kheiñ lang baroh ka jingrung krem mynta u snem 2022 ka la kot sha ka 13.35 km.
Kat haduh mynta u Naiwieng 2022 ki la don haduh 1700 tylli ki krem kiba la tip bad bna ha ka jylla bad kiba la rung bad dang shu sdang ban rung ki long 1000 tylli. Da kaba kynthup ïa kaba mynta u snem ka jingthew jingwoh ïa ki krem ha ka jylla ka la kot sha ka 531 Km baroh bad dang bun kiba dang hap ban pyndep.Kane ka pynpaw ba ka jylla Meghalaya ka dei kawei na ki jylla ba bun ki krem ha ka pyrthei.
Kiba bun ki krem kiba la rung bad thew bad woh ha ka jylla ha kine ki 30 snem ki dei kiba la pynshoh biej da ka jingoh dur bad ohshrong ki bor mariang bad kim don ka jingïapher na kiwei ki krem kiba lalap ha kiwei ki ri ka pyrthei. Nalor kata ki don ruh ki jingthaw kiba pher bapher kiba im hapoh kine ki krem.
Ka MAA ka ai khublei kyrpang iaka tnad Sport bad Youth Affairs jongka sorkar jylla, ka Meghalayan Age Limited kiba la ai ka jingïarap namar khlem ka jingïarap jongki ka jingrung bad jingthew jingwoh bad jingbuh jingkheiñ ïaki krem kan ym long kaba jop, pynkut ka kyrwoh ba la pyllait da u General Secretary ka MAA bah Brian D Kharpran.