Shillong, Ïaïong 16: Ka khubor ba la ïoh na ki pulit la ïathuh ba u Coy-Commander, F-Coy, 50th BN., ka BSF u la phah ka jingujor ba ha ka 8 tarik mynta u bnai ha ka por 5.30 baje mynstep, u shipai BSF uba don ha ka kamram u la lap ba ka la don ka jingrung tuh napoh u pud u sam ka India Bangladesh kaba dei hapdeng ka BPL No. 15 bad 16, kaba ïaid na ka NP NO. 1090MP/2-5, hapoh ka AOR jong ka Gujangpara BOP kaba ha South West Garo Hills.
Ha kawei pat ka jingjia ha ka 8 tarik mynta u bnai ha ka por 3.30 baje mynstep, ki pulit ki la ïohpdiang ka jingpyntip na ki nongshong shnong ka Boldakgre (SWGH) ba ki la ïoh bat ïa kawei ka Bolero pick-up kaba don u nombar AS-34C-0518 hapoh ka shnong halor ka jingsuba ba ka kit tuh ïa ki jingri. Ha ka por ba dang tohkit la sngewthuh ba ha ka por 1.30 baje mynstep, uwei na ki nongshong shnong u la lap ba ki la don haduh 3 ne 4 ngut ki runar bym lah ban ithuh kiba la pyrshang ban kem ïa ka masi jong u da ka jar, hynrei tang mar shu ïohi ïa u, kitei ki runar ki la phet krad napoh ka PO. Hynrei na ka liang ki nongshong shnong ki la ïoh bat ïa ka kali ha ka thaiñ Boldakgre; hynrei na ka liang kiba shong hapoh ka kali ki la ïoh lad ban phet ha kaba ki la ieh noh ïa ka kali bad hadien na ka liang ki pulit ki la kurup noh ïa katei ka kali.
