Nongstoiñ, Ïaiong 7: Ka seng WKSU Nongstion pyllun lyngba ka hok wad jingtip, ka la lap ba ka jingpyntrei ïa ka surok Nongstoiñ Sohpian, ym shym la pyntrei lut ïa ki jingtrei, kata kumba la mang palat 8 klur tyngka.
Ka WKSU ka la lap shibun ki jingduna lane ki jingïapher katkum ka Detail Project Report, kaba thmu ban shna ïa kane ka surok. Ka seng ka buh jingkylli ruh na u Contractor ha kaba ïa dei ban ki traffic sign, pavement markings bad ka footpath kumba la buh ha ka mang tyngka. Ka seng ka buh jingkylli ka long ba hato la shna ne bad lano yn shna ïa kine.
Na ka liang ka seng ka kyntu ïa u Contractor ba un pyntrei noh ïa ka footpath, pavement markings bad ka traffic sign, khnang ba kan pynsuk ïa ki khynnah skul jong ki 7 shnong kiba ïaid lynti lyngba katei ka surok. Ha kajuh ka por ka ai jingkyrshan ïa rangbah shnong jong ki 7 tylli ki shnong ba ki lah mih madan ban pynpaw ïa ka jingbym hun halor ka jingpyntrei ïa katei ka surok National Highway.
Halor ka jingbym don bor ban mang pisa jong ka National Highway, na ka liang ka seng ka ai jingmut ïa ka sorkar ba kan ai N.O.C noh sha ka tnat PWD jong ka jylla lane sah u E.E Nongstoiñ Division, khnang ba kan lah ban pynbha bad pynheh ruh ïa katei ka surok.
