Lap ka PAC ba mad jingeh ki jaka sumar ban pynïaid beit ka jingpyntreikam ïa ka MHIS

Shillong, Naiwieng 17: Ka Public Accounts Committee (PAC) jong ka Meghalaya Legislative Assembly ka la leit ban jurip ïa ki 4 tylli ki jaka sumar kiba heh ha Shillong ha ka sngi Nyngkong ban bishar ïa ki jingpyntreikam jong ka Megha Health Insurance Scheme (MHIS) ha kaba ka la lap ruh ba mad jingeh ki jaka sumar ban pynïaid beit ïa ka jingpyntreikam ïa ka MHIS.
Kane ka kynhun ka la leit ban jurip ïa ka Civil Hospital Shillong, Ganesh Das Hospital, ka North Eastern Indira Gandhi Regional Institute of Health and Medical Sciences (NEIGRIHMS), bad Super Care Hospital.
Ha kane ka jingjurip, ka Committee ka la ïoh ban ïa kren bad ki bor pynïaid ki hospital bad ki nongtrei kiba khmih ïa ka MHIS khnang ba kin tip ïa ka rukom treikam, ki jingïoh mad kiba ïoh myntoi bad ka rukom ïaid ka ba khlem jingthut haba ïadei bad kane ka scheme.
Ka kynhun kaba la leit jurip ka kynthup ïa ka Miani D. Shira, MLA & Chairperson, Public Accounts Committee, Dr. Celestine Lyngdoh, MLA & Member, u Bah Brightstarwell Marbaniang, MLA & Member, u Shri Rupa M. Marak, MLA & Member, bad u Bah H.M. Shangpliang, Adviser (Administrative), Public Accounts Committee.
Ka Chairperson ka PAC ka Miani D. Shira ka la ong ba kane ka jingwan jurip la shim ban tip bad sngewthuh ïa ka jingpyntreikam ïa ka MHIS ha ki jaka sumar ka jylla, ka sorkar pdeng bad ki jaka sumar shimet. Ka la kdew ba watla kane ka scheme ka la long kaba biang bha ha ka jingpynwandur, hynrei ki hospital ki dang ïaibteng ban mad ki jingeh ban pyntreikam kaba la kwah ïa ka kam jingai jingshakri.
Ka Chairperson ka la banjur ïa ka jingangnud ka Committee ban pynthikna ïa ka jingai jingshakri kaba lah ban pynsuk sha ki paidbah, kaba ïaid beit bad kaba suk ïa ki nongshong shnong bad kaba lait na kino kino ki jingeh. Ka la pynpaw shuh ba ka Committee ka la ïoh ruh ban pynlong ki jingïasyllok kiba bniah bad ki bor pynïaid ki hospital bad ki nongtrei ka MHIS, la thoh ïa ki jingeh bad ithuh ruh ïa ki jaka ba donkam ban pynbha.
Ka PAC kan sa lumthup ïa ki jingshem jong ka bad ban aiti ïa ki jingmynjur sha ki tnat ba dei ban shimkhia ban pynkhlaiñ ïa ka rukom pyntreikam ïa ka MHIS. Ka Committee ka la banjur ïa ki lad jingïada na ka bynta ka bha ka miat ki paidbah haba pyntreikam ïa kane ka skhim ka ban long ka jingmyntoi ïa ki paidbah ka Meghalaya.