Nongpoh, Lber 20: Hadien ka jingioh nam ka thaiñ Byrnihat kum kawei na ki jaka ba jaboh tam ka lyer haka pyrthei, bad hadien ka jingbthah jong ka sorkar lyngba ka tnad Forest and Environment ïa ka tnad Meghalaya State Pollution Control Board ban pynlong ka jingjurip bad tohkit bñiah ïa baroh ki karkhana kiba don haka thaiñ Byrnihat, mynta ka sngi ka kynhun jong ka MSPCB kila hiar sha ka thaiñ Byrnihat ban sdang ïa ka jingwad bñiah bad ka jingtohkit kumba ka sorkar ka la ai por hapoh shi taiew ban pyndep shuwa ban aiti ïa ka kaiphod.
Ïa katei ka kynhun jong ka MSPCB lyngba ka task force ba kynthup naduh ki Scientist, ki Environment Engineer la ïalam da u Dr. G.H Chyrmang Member Secretary, haka jingdon lang u Bah S. Swer u ba dei u Scientists bad ki Environmental Engineer kiba kynthup ïa u Bah S. Syiem, u Bah YF Laloo bad u Bah M. Tiewsoh.
Haba kren sha ki lad pathai khubor, u Dr GH Chyrmang u la ïathuh ba na ka liang ka MSPCB ka la dep ban thaw ïa ka Task Force mynta la kumba shisnem eiei ban khmih bñiah ïa ki karkhana kiba kham heh bad tang mar ïa ioh ïa ka hukum na ka tnad Forest na ka liang ka MSPCB mynta ka sngi ka la sdang ïa ka jingjurip ban pynlong ka jingtohkit ïa ki karkhana kumba ki hap ban pyndep hapoh 7 sngi shuwa ban aiti ïa ka kaiphod sha ka sorkar.
U la ong ruh ba sorkar hapoh ka jingïalam jong u Myntri Rangbah u Conrad K Sangma kila rai ban don ka jingïatreilang bad ka sorkar Assam ban weng ïa katei ka jingeh namar ka jingjaboh ka lyer ha kitei ki thaiñ kam dei tang na ki karkhana ba hap ha jylla Meghalaya hynrei ruh haka jylla Assam, bad na ka liang ka Assam Pollution Control Board kila sdang ïa ka jingjurip bad ka jingtohkit namar ka sorkar jylla bad ka MSPCB ki pyrshang katlah kat iai ban wad ki lad ki lynti ban pynduh noh ïa ka nam ba ka Byrnihat ka ioh kum ka jaka ba jur tam ka lyer jaboh tam haka pyrthei.
U la ïathuh ruh ba ka tnad MSPCB kam shongkli kti bad kane ka jingkhmih bñiah kam dei shuh ka sien kaba nyngkong hynrei kila ju leh na ka por shaka por kumba dang haki khyndiat bnai ba la dep ka MSPCB ka la dep ruh ban khang khyrdep kumba 7 tylli ki karkhana kiba pynkheiñ bad ïaid lait ïa ki kyndon pynmih tdem jaboh.
Shuh shuh u la ong ruh ki don kumba 8 tylli ki karkhana kiba jur ka jingpynmih ka tdem jaboh haka thaiñ Byrnihat bad ïa kine ki karkhana la bthah ruh ba kin buh ïa u Pollution Control Device (PCD) ban tehlakam ïa ka jingmih jong ka tdem jaboh bad lada kim don ïa une u tiar, lane utei u tiar u don jingthud kin nym lah satia ban plie bad bthah ba ki dei ban pynbiang shuwa ïa utei u tiar shuwa ba kin treikam bad plie biang.
U la ïathuh ruh ba bun ki karkhana kiju leh tuh bad pyndonkam ïa utei u tiar Pollution Control Device tang haka por ba don ki briew jong ka MSPCB, hynrei ki pynlip noh ynda ym don shuh ba peit, da kaba ai daw ba rem ka bai bording.
U Bah Chyrmang u la ong ruh ba na ka liang ka MSPCB kan khmih bñiah ym tang ïa ka lyer jaboh hynrei ka wat ka jingpyntuid jaboh sha wah, kumba kiba bun na ki karkhana haka thaiñ Byrnihat ki don harud ka Wah Umtrew.
