Lap ka MHRC ba pynkheiñ hok longbriew ki Pulit ha Rimpu Bagan phah siew 7.5 lak tyngka sha ki 15 ngut

Shillong, Kyllalyngkot 30 : Ka Meghalaya Human Rights Commission (MHRC) ka la aiti ïa ka kaiphod jingbishar sha ka Sorkar halor ka jingujor ba pynkheiñ ïa ki hok longbriew manbriew ha resort Rimpu Bagan, West Garo Hills ryngkat ka jingai jingmut ba dei ban siew bai lutksan haduh 7.50 lak tyngka sha ki 15 ngut ki briew kiba shah thombor ha ki pulit.
Lah ban kdew hangne, ka Rimpu Bagan ka dei ka resort jong u MDC ka BJP na Tura bad Chairman ka ANVC-B ba la pynduh pyndam u Bernard Marak.
ïa kane ka kaiphod jingbishar la phah sha u Principal Secretary ka Tnad kam Pohïing (Police) ha ryngkat ka jingai jingmut ban siew kum ka jingiarap (compensation) ba mar 50,000 tyngka sha ki 15 ngut ki lanot ba shah pynkheiñ ka hok longbriew manbriew kaba long baroh 7,50,000 tyngka.
Kat kum ka kyrwoh na u Secretary ka MHRC L.Ch Marak, la pyntip ba ka Commission ka la register haduh 30 tylli ki case ba ïadei bad ka jingujor ba pynkheiñ ïa ka hok longbriew manbriew ha ka por ba leit khynra ki Pulit bad set ïa ki briew ha Rimpu Bagan, West Garo Hills ha ka 22 tarik Naitung 2022.
Ka ong ba napdeng ki 30 tylli ki case bala register, haduh 15 ngut ki nongujor kila weng noh ïa ka case.
La pyntip ba ka Commission ka la shong bishar tang ïa 15 tylli ki case bad hadien ka jingbishar ïa ki sabut na baroh arliang mamla, ka Commission ka la pynmih ïa ka hukum ha ka 29 tarik Kyllalyngkot 2026 bad phah sha u Principal Secretary ka Sorkar Jylla.