Lap ka KSU Narpuh ba ka NHAI kam pat pynkhuid lut ïa ka khyndew kaba twa

Khliehriat jylliew 2: Ki dkhot jong ka Khasi Students Union Narpuh Circle kiba hapoh ka jingialam u Vice President u bah Phanuel Tongper bad u u Assistant Organising Secretary KSU-EJHDU, u bah Olenbat Pdang, hynnin ka sngi ki la leit ban jurip ïa ka surok national highway kaba naduh Mynkre ter ter bad lap ba ki dang bun ki jaka ne ki bynta jong ka surok ba ki nongtrei jong ka National Highway Authority of India kim pat shym la pynkhuid lut ïa ka khyndew kaba twa ha kito ki por ba dang jur slap.
La ong ruh ba ki dang bun ki bynta jong ka surok kiba dang shah kah shiliang ka lynti ha ka khyndew kaba la twa ha kaba ki kali ki dang hap ban iaid tang shiliang ka surok, kane ka jingiaid ki kali tang shiliang ka surok ka ju wanrah ïa ka jingdheng kali kaba khah khah ha ka thaiñ kaba buh jingeh haduh katta katta ïa ki nongleit nongwan kiba iaid lyngba na katei ka surok NH-6 ha Narpuh.
Ym tang katta, ki nongtrei jong ka NHAI haba iakren bad ki dkhot ka seng ki la pynpaw ba kim iohlad bha ban pynbha ïa ka surok namar ba ki kali kim ngeit satia ïa ki nongtrei bad ki iaid beit ha kaba kin ju sangeh haba phah sangeh tang shiphang ruh bad dei na kata ka daw ruh ba ki nongtrei kim iohlad satia ban trei bha ïa ka kam maramot.
Ki dkhot ka seng ki lap ruh ba ki don tang ar tylli ki puh shi lum bad ong ba dei na ka daw ba duna palat ki puh shi lum ba ki nongtrei ka NHAI kim pat lah ban pynkhuid lut ïa ka khyndew kaba la twa, ki dkhot ka KSU Narpuh ki pynpaw ka jingsngew lyngngoh ba mynta lah jan don shi bnai ba u slap u la duna hynrei ka NHAI kam shym la shim khia eiei ban maramot ïa ki thliew kiba la long kum ki pung ha shi lynter ka surok NH-6, ka seng ka byrngem ba lada kam shim khia kumne ka seng kam banse ban pyni noh da ki kam khnang ba ka NHAI bad ka sorkar kin ïa pei shkor.