Nongstoiñ, Nailar, 07: Ka KSU Mawshynrut ka la lap dalade ïa ka jingshim kabu bad leh tangdep jong u Contractor, u ba ïoh jingtrei ban shna ïa ki ïing na ka skhim PMAY ha ka shnong Mawkhumkha, ka shnong kaba don ha Mawshynrut Civil Sub Division.
Ki nongïalam ka seng ha ka jingïalam jong u Samla Armstrong Sohshang President bad Samla Ulysis Ryntong General Secretary KSU Mawshynrut Circle, ryngkat katto katne ki dkhot, dang ha kine ki khyndiat sngi ki la leit ban jurip ïa ki ïing ba ïoh ïa ka scheme PMAY ha shnong Mawkhumkha, ha kaba ki la lap ba ka jingujor ba ki ïoh ka long kaba shisha.
Haba poi ha katei ka shnong, ka seng ka dap da ka jinglyngngoh haba ki ïohi ïa ki ïing ba ïoh ïa ka scheme PMAY na ophis jong u Block Development Officer, ki shu shah ieh ryngjaiñ khlem shna pyndep. Ka seng ka la ïoh ban kylli markhmat bad ki nongïoh ïa ka scheme ha ryngkat u Sordar Shnong, ha kaba ki la ïathuh ba ïa kitei ki hynñiew tylli ki ïing la dep ai contract lane ban pynshna ha u bah Gerald Tynhiang haduh ban da dep.
Hynrei, la ïathuh ba utei u rangbah u khlem shna pyndep ïa kitei ki ïing bad ïa ka pisa ruh baroh ar installment la dep ai ha utei u contractor. Kaba kham sngewsih ka long ba hadien ba kitei ki longïing ki wan ban kyrpad ïa u ban shan pyndep ïa ki ïing, la ong ba u byrngem bad kren khor kylla ïa ki.
Na ka liang jong u Sordar katei ka Shnong u J.Nongbak, u la pynpaw ka jingsngewdiaw ïa ka jingleh kheiñ sting bad ka jingbym ñiewkor jong u ïa ki para briew. U la pynpaw ruh ba kane ka jingleh, ym dei ba ka pynduh nong tang ïa kitei ki Ïing, hynrei wat ïa ka Shnong baroh kawei, namar ka ophis jong u BDO kan nym ai scheme shuh katba ym pat lah pyndep ïa kitei ki ïing.
U la ïathuh ruh ba ha jingshisha ki la pynsngew ruh ha u BDO ïa kane ka bynta. Na ka liang u BDO u la kular ruh ban pyndep ïa ka kamram hapoh 15 sngi. Hynrei haduh mynta shi bnai tam u khlem leh ei ei. Dei na kata ka daw ba ka Shnong ka ai jingtip bad shaniah ha ka seng KSU ba kan ïarap ïa kane ka bynta.
Na ka liang ka seng ka la dep ïakynduh bad u BDO ban pynsngew ïa ka bynta bad ban hukum ïa utei u Contractor ban shna dep noh ïa kitei ki ïing, namar katkum ka jingïakut bad ka por kam ïahap shuh la ong ki nongïalam ka Seng. Ki nongïalam ka seng ki la kren shai kdar ba da lei lei kin nym shnong kli kti, hynrei kin ïai buddien ïa ka kam haduh ba kiba shah leh beiñ kin ïoh ïa la ka hok.
