Shillong, Lber, 22: Ki briew kiba don jingduna ha ki dkhotmet ki la pynpaw ïa ki jingeh balaiphew jait naduh ka jingbym biang ha ka leit ka wan, ka jingshah ibieñ ha ki nongniah kali kamai, ka jingshah khapngiah ki lynti ïaid kjat na ka jingshah klun jaka ha ki nongdie madan bad khmtam eh ka jingleh bym tip aiñ jong ki nongniah kali kamai bad kiba shim kabu ruh hateng hateng wat ban bam ei ïa ka pisa batam jong ki briew kiba duna dkhotmet.
Kine ki jingeh ki la paw pyrthei hadien ka jingwad bniah jong u Samla Ferdinand Marshyllong u samla uba don jingduna ha ka bor ïohsngew.
Ha ka jingïakren bad ki lad pathai khubor ha ka sngi Balang, u Samla Ferdinand u la ong, “ha ka jingwad bniah nga lap ba 50 percent ki briew kiba don jingduna ha ki dkhotmet kiba shong basah ha nongbah Shillong bad ha ki shnong kiba marjan kiba pynpaw ïa kiba bun ki jingeh.”
“Ki jingeh namar ka jingrit bad ka jingkhim jong ka surok ka buh jingeh ïa kiba duna dkhotmet ban jam na shiliang sha shiliang jong ka surok. Ka jingrit shaba palat ki lynti ïaid kjat nalor ba ki dap da ki thliew ki syar, ki post elektrik hapdeng lynti, ki diengbah, ka jingdon ki mawkyndon bad khamtam eh ka jingwit jong ki nongdie madan,” ula ong.
Une u Samla u la ong ba ruh ba ha kane ka jingwad bniah u la lap ba kim don satia ki jingkdew (Signage) ïa ki bos bad ïa ki Taksi kamai kiba la buh jingeh pat ïa kiba duna dkhotmet, khamtam ïa ki briew kiba duna ka bor ïohsngew jong ki skhor bad nalorkata u la lap ruh ba ki Bos bad ki Taksi kamai kim da pushe ban kyntiew ïa kiba duna dkhotmet haba leit jingleit.
“Kiba duna dkhotmet kim ïoh hi ruh wat tang ki jaka shong haba kiew ha kali kamai bad ki hap ban siew bai kali kumba ju long kiwei pat ki parabriew bad nalor kata ka dor bai shong kali ka ïapher na kawei ka kali kamai sha kawei pat,” u la ong.
“Bun na ki nongniah kali ki ju kyntait ban kyntiew ïa kiba duna dkhotmet bad don ki khep ba kiba duna dkhotmet ki shah ibeiñ, don ruh ki nongniah kali kiba ohdor ar shah ïa ka dor bai kali bad don pat sa ki nongniah kali kamai kiba khlem akor da kaba shim kabu ban nym pynphai shuh hi ruh wat ïa ka pisa batam ba la siew bai kali da ki briew kiba duna ka bor ïohi jong ki khmat,” la ong u Samla Ferdinand.
Ki kynhun jong ki briew kiba duna dkhotmet kiba kynthup ïa ka National Centre for Promotion of Employment for Disable People, ka Barefoot Trust, ka Meghalaya Deaf Association, ka Khasi Disabilities Assocation, ka Blind Lead Trust bad ka Meghalaya Liberation for Visual Impaired ki kyntu ïa ka Sorkar Jylla ba kan wad ïa ki lad ki lynti ban pynsuk ha kaba ïadei bad ka leit ka wan jong ki briew kiba duna dkhotmet,” u la ong.
U la ïathuh ba ka jingdon jong ki briew kiba duna dkhotmet hapoh ka jylla ki long 1.4% na ka jingbun briew hapoh ka jylla Meghalaya hynrei wat ki riewtymmen kiba don tang 6% ruh ki ïakynduh mawsiang ha ka leit ka wan.
Haba phah ïa ki jingai jingmut sha ka Sorkar, u Samla Fedinand u la ong, “ka sorkar ka dei ban pyntreikam ïa ka Pre-paid Taxi Service, ban pynduna ïa ka dor shong kali kiba duna dkhotmet, ban ïarap lem ha ki jaka paidbah, ban ai laisen kyrpang ïa kiba duna dkhotmet da kaba tah ïa ki Stickers ha ki kali ar shaka bad saw shaka, ban shna ïa ki lynti ïaid kjat ba pynsuk ïa kiba shong da ki Wheelchair, ban buh kyrpang ïa ki jaka pynieng kali ïa kiba duna dkhotmet, ban buh ïa ki jingkdew (signage) ha ki Bos, ki Taksi, ki kali Tourist bad ha ki ophis Sorkar, ban siang Tactile ïa ki lynti ïaid kjat bad ban dro ïa ki Zebra Crossing ha surok, ban pynheh ïa ki surok bad ban tap ïa ki nala kiba buh jingma ïa ki nongïaid lynti.”
