Lap ka HITO-Jaiñtia Hills ba shim pisa be-aiñ ki nongtrei ka JHADC na ki kali bar jylla kiba ïaid na NH-6 Sonapyrdi
Khliehriat, K’Lyngkot 08: Ha ka jing jurip bad jingkhynra kot Trading License, ka Hynñiewtrep Integrated Territorial Organisation Jaiñtia Hills hapoh ka Jiangïalam u President, u bah Burom Dkhar lem bad ki wei kiwei ki nongïalam jong ka seng HITO ki la lap ba kane ka khyrdop khrong khajna jong ka Jaiñtia Hills Autonomous District Council kaba don ha Sonapyrdi, East Jaiñtia Hills ka la pynkheiñ ïa ka kyndon ba la buh da ka office jong ka Secretary, ka Executive Committee jong ka JHADC.
U President jong ka HITO na Jaiñtia Hills, u la ong ba katkum ki kyndon ba la ïakut bad ïa soi, ki kyndon ki kdew ba ïa ki kali kiba na Assam, Tripura, Mizoram bad kiwei kiwei ki kali jong ki bar jylla kiba kit ïa ki mar kiba shu ïaid lyngba kim dei ban talasi ïa ki trading licence bad ki bar jylla kiba ñiah kali ruh kim don kam ban pyn i ïa ki trading licence ha ka tei ka Khyrdop jong ka JHADC ha Sonapyrdi, hynrei ki nong trei jong katei ka Khyrdop ki la bat beaiñ bad shim pisa beaiñ ruh na baroh ki kali jong ki bar jylla kiba iaid lyngba kane ka Khyrdop, na ka Liang ka seng ka la byrngem ba kan sa ujor sha JHADC ban pynduh, pyndam noh ïa katei ka soskular bad u nongshim wai jong katei ka Khyrdop bad lada ka JHADC kam leh ei ei ka seng kan ujor sha ka ïing bishar da ka PIL.
Shuh shuh ka seng kala pan jingpynshai na ka Jaiñtia Hills Autonomous District Council ba hato haba la aiti ïa ki Khyrdop khrong khajna sha ki riew shimet, hato ki nongshim wai jong ki Khyrdop ki lah mo ban pynkheiñ ïa ki kyndon ba la buh ha ka soskular ba la ïa soi.
Shuh shuh ka seng ka buh jingkylli ïa ka JHADC ba hato ha kane ka jingshim pisa na ki kali kiba wan na bar jylla, hato ka pisa kaba mih na kane ka khydop ki buh shaei bad ka leit shaei? “Ngi lap ba don bun ki jingduna ha ka council bad lap ba wat ka tulop jong ki nongtrei ka JHADC ruh mynta la bun bnai kim ioh tulop satia, ngi iohi ba ka jingmih pisa na kane ka khyrdop ka long kaba bun bha hynrei phewse ngi iohi ba ki nongtrei pat kim ioh tulop, kumta ka Council ka dei ban pynshai ïa kane bad ngi kylli ruh ba hato balei ka council ka shim pisa na ki kali bar jylla? Hato ka aiñ bad ki kyndon ki don mo ban shim pisa na ki kali bar jylla kiba kit mar? ” ong u President HITO Jaiñtia Hills.