Shillong, Jylliew 26 : Ka GS Southern Zone ha ka jing leit jurip ba syndet syndet ïa ka Civil Hospital ha Baghmara, South Garo Hills ka la lap ba ka tnum jong katei ka hospital ka la pei bad jaw um lut ha kaba ki nongpang ki hap ban kynriah jaka thiah na kawei ka jaka sha kawei ka jaka ban lait na ka jingjaw slap.
Naduh ki khyndiat bnai ba la dep na ka liang ka GSU ka la dep ai ka jingujor ba katei ka tnum jongka hospital ka lapei hynrei ka tnad ka koit ka khiah kam shym la shim khia satia ban pynbha. Ha kine ki khyndiat por ba ther u lapbah, ki nongpang bapli ki hap ban rah jingthiah na kawei ka jaka sha kawei ban lait na ka jingjaw um.
La pynpaw ba ki painkhana ruh ki long kiba jaboh bad kiba la sniew lut bad kane ka la wanrah ka jingsma iwtung ha katei ka hospital. Nalor kata ki pangkha ruh kim treikam satia bad ki nongpang ki la mad ïa ka jingshit kaba jur nalor ka ka South Garo Hills ka jur bha ka jingshit ba ka la jan bad ki bynta khappud ka Bangladesh.
Kumta ka GSU ka kyntu ïa ka tnad ka koit ka khiah ban shim khia ïa kine ki jingeh ba ki paidbah ki ïakynduh ha katei ka hospital bad ban pynbha noh kloi ïa ki.
