Shillong, Naitung 3 : Ka Geological Survey of India (GSI) hadien ba ka la jurip bniah bha ïa ka jingthmu jongka sorkar ban tei da kawei ka jingkieng ïaid kali na shaneng ka jingkieng Dam Umiam ka la lap ba kam long kaba bit ban tei ïa kane ka jingkieng ïoh ka ktah ïaka Dam namar ka khyndew ruh ka la jem bha kumta mynta ka sorkar ka dang phah jurip biang ha ka GSI ban tei noh ïa ka jingkieng na ka bynta ban sharum jongka Dam.
Ka sorkar ka la pynkhreh ban tei da kawei ka jingkieng ïaid kali hadien ba ka rta jong kane ka Jingkieng Dam ka la jan kut noh.
“ Ha ka kaiphod jongka GSI la pynpaw ba hadien ba la dep jurip bad test ïa ka khyndew la lap ba kam long satia da lei lei ruh ban tei ïa ka jingkieng shaneng ka jingkieng Dam kata na kato ka jaka ba ai ka MeECL ban pyndonkam shipor ki shipai ban niah lieng namar kane ka lah ban ktah pynban ïa ka Dam kumta ka sorkar ka la rai ban tei noh ïa ka jingkieng na sharum jongka Dam bad halor kane la phah ïa ka GSI ban jurip da kawei ka jaka ba thymmai” ïathuh u Symbud Myntri Rangbah bah Prestone Tynsong.
La kyntu ruh ba kin leh kloi ïa kane ka kam.
La ïathuh shuh shuh ba lyngba ka Dam Rehabilitation and Improvement Project (DRIP) kaba dang pynkhreh shaid shaid mynta, yn pynskhem shuh shuh ïa kane ka jingkieng Dam. Kiwei pat ki jaka ban pyndonkam ïa ka DRIP ki long ha ka Leshka Power Project, Umtru Stage I bad Umtru Stage II.
U la ïathuh ba ka jingpynkhreh ban khot tender ka la jan dep bad kane ka project ka dei kaba 440 klur tyngka ba la mang na ka bynta ka jylla. “ Ngin pyntreikam ïa kane ka projek ha kiba bun wat bad ha ka bynta ba nyngkong ka jingkhot tender kan long shwa 100 klur tyngka. Lyngba ka jingpyntreikam ïak a DRIP kan ïarap ban pynjlan shuh shuh ïa ka rta jong ka Dam” ong u bah Prestone.
