Shillong, Jylliew 20: Ka Assembly’s Committee for Women Empowerment (ASCWE) ka la lap ba kam don ka jingïatreilang na ka jingbym ïasngewthuh jingmut hapdeng ka Meghalaya State Commission for Women MSCW) bad ka Meghalaya State Commission for Protection of Child Rights (MSCPCR) bad ki Pulir ha kaba ïadei bad ki kam thombor ïa ki kynthei bad ïa ki khynnah, khamtam eh ha kaba ïadei bad ka jingshah pynïap ki arngut ki shipara ha Nongrah.
Haba ïakren bad ki nongthoh khubor, ka Chairperson jong kane ka Committee, ka Kong Ampareen Lyngdoh, ka la ïathuh ba ka Committee, ka la khot hajir ïa ki nongmih khmat na kine ki lai tylli ki bor bad ka la lap ba ki don shibun kiei kiei ki bym ïaid beit ha kaba ïadei bad kane ka jingjia ha Nongrah. “Ki la don bun ki jingïakynnoh mar kylliang hapdeng jong ki”, la ong ka Kong Ampareen.
Ha kajuh ka por ka la ong ba na kane ka jinglap ka Committee jong ka Assembly, ka donkam ka jingpynsngewthuh kaba kham janai shuh shuh ha kaba ïadei bad ki rukom tohkit bad ki jingtreikam kiba ïadei bad ki jingjia kiba kum kine.
