Tura, Jylliew 17 : Ki lai ngut ki khynnah kiba hapdeng ka rta 8-10 snem kiba la pyntip da kiba haïing hasem sha ki pulit ba ki la jah rngai naduh hynnin ka janmiet ha ka thaiñ Chibinang, West Garo Hills da ka jingsuba ba ki lah ban shah rong ha ka umsaw namar ka don ka wah kaba ïaid narud ka shnong hynrei mynta ka sngi ki pulit ki la lap ba ki khlem lei lei hynrei ki don ha kawei ka long ïing ha kawei pat ka shnong namar hynnin ka miet ba la jur eh u slap bad kem dum ka bneng kumta ki la sahmiet noh ha ïing u paralok ba ki ïalap miet ban ïalehkai lang.
Ki pulit naduh hynnin hi ka janmiet ki la pynlong ka jingleit wad ïa kine ki khynnah bad haduh mynstep ruh ki la bteng biang. Kiba haïing ki la ïathuh ha kaba nyngkong ba saw ngut ki khynnah na ka shnong Kalapani kiba hapdeng ka rta 8-10 ki la jah rngai ha ka janmiet Sngi Palei. Kiba haïing ki la sheptieng eh ïoh kine ki khynnah kila shah rong ha ka umsaw namar ka don ka wah Ringe kaba tuid narud shnong bad ka la shlei bad kiew um bha la katto katne sngi na ka daw ka jingjur slap.
Haba ki pulit ki la tohkit bniah ki sa lap ba kiba jah rngai ki dei tang lai ngut. Ki pulit ka Phulbari ki la pynlong ka jingthwet kaba jur bad ha kaba khatduh ki la lap na kawei ka ïing ha ka shnong Bangalkata namar ki la leit ïalehkai sha katei ka shnong bad ha ka jinglapmiet la lap noh ka miet. Kumta kim nud shuh ban leit phai ïing namar ka jingjur slap bad lyer bad ki la sah ha katei ka ïing u paralok ha Bangalkata.
