Khliehriat, K’Lyngkot 02 : Ki bor pulit ki ïathuh ba ha ka janmiet jong ka 29 tarik Nohprah ki la lapdien ïa kawei ka metiap jong uwei u rangbah bym lah ban ithuh napoh kawei ka sem masi kaba Don ha shnong Lakasieñ, Pohphang hapoh East Jaintia Hills.
Katkum ki jingtip ba nyngkong la iathuh ba une u lanot uba la khlad noh u dei uba trei hapoh katei ka sem masi mynta lah kumba shi bnai ei ei.
Ïa une u briew ïa mynta hi la shu ithuh tang da ka kyrteng Justin bad ym shym la ioh ïa ki jingtip ba kham bniah shaphang jong u lane ym pat don kino kino ki jingpynithuh ba la ioh na katei ka jaka ba la lap ïa ka met jong u.
Une u briew u ba don ïa ka rynieng 5’3″ u dei uba kham met pdeng briew, uba kham jrong durkhmat, uba rit shñiuh bad uba don ïa ka dak ingding kumba haduh 80 percent ha ka met jong u na ki bynta ba shadien jong ka met.
Ha ka por ba la lap ïa kane ka met iap une u briew u phong da ka sopti T shirt rong saw, jaket blue, patlun jyrngam bad ka baje kti Quartz kaba iong.
Hadien ba la pynlong ïa ki jingdonkam baroh kynthup ïa ka jingleh post mortem, ïa kane ka met la pynkynriah noh shapoh ka jaka buh metiap ha Civil Hospital Khliehriat. Kane ka jaka ba jia ka hap hapoh ka Saipung Police Station.
