Nongstoiñ, Naitung 5: Wat hapdeng ka jingïaid jong ka por bad ka jingnang roi ka jingnang jingstad, hynrei haduh mynta hi ka imlang ka sahlang ka ju kheiñ ba ïa kiba la kha bad pang Anna, ne kiba kylla duna noh na ki jingpang ne na kino kino ki jingjia aksiden, ki dei kiba kham sniew bok ha sla pyrthei.
Na ka bynta kine, lait na ki kmie ki kpa kiba pun ba kha bad khyndiat eh ki hymmen ki para ne kiba haïing, kiba ju kdup ïa ki naduh ka mynsiem ba shisha. Khambun hi ka jingieit ki kmie ki kpa ka kham theh lut ha ki khun kiba don jingduna, namar kaei ka ban jia ha ka jingim bad ka lawei hadien jong ki dei tang ki kmie ki kpa ba sngewthuh.
Halor kane ka bynta, na ka liang ka sorkar India, ka la dep ban shna kyrpang da ka buit treikam na ka bynta jong ki bad ka la long kawei ka aiñ kaba donkam eh. Kane ka aiñ ka la don lypa naduh ki por mynshuwa ha ka ri bad la nang pynbha shuh shuh katba nang mih ki por ki ïa, halor ka nongrim ba don jingmut ba ma ki ruh, ki dei hi ki briew ym lah ban kyntait na ka kyrdan imlang sahlang, ban kheiñ ruh ïa ki kum ki para briew bad ki dei ruh ban ïoh ïa ka hok ba mar kumjuh.
Kumba ka long mynta, ka sorkar India, ka nang pynbha shuh shuh bad ban shim ïa ka jingkitkhlieh ban ithuh kyrpang ïa ki. Ka sorkar Jylla Meghalaya, dalade hi ka la pynbna lyngba ka Meghalaya Gazette dt. 29.12.2017, ïa ka aiñ: “Right of person with Disabilities Acts 2016, (Central Act 49 of 2016).
Ka Sorkar India lyngba katei ka aiñ, ka la bthah ha man la ki Sorkar Jylla ban buh ki Committee bapher bapher, naduh ka Committee ban wad bniah ïa kiba pang Anna, ka State Advisory Committee, ka District Level Committee, ka State Commissioner for persons with Disabilities bad haduh ki Committee School, ban wad bniah naduh ki kyndong kynshrot ïa kiba kum kine ki ba pang sniew bok. Na ka bynta kane, ka Sorkar India, ka phah ruh bad ka pisa kaba biang.
Hynrei, kaba sngewsih ka long ba ha ka West Khasi Hills District, kat kiba leit rah Nongpang Anna hapoh Civil Hospital Nongstoiñ, ban phah sumar ne ban ïoh Certificate Anna (Disabilities Certificate), khnang ban ïoh apply ïa ki lad jingïarap na kitei ki scheme kyrpang (Felicities, Concession and benefits). Hynrei, ïa ki la phah beit sha Civil Hospital Shillong, namar ym pat don Doctor kiba peit ïa kiba anna hapoh ka District haduh mynta.
Kum kine ki jingjia, ki pynjew slew bad wanrah jingeh haduh katta katta, khamtam ïa kito ki longïing kiba duk, kiba bym ïoh lad ban kiew shaduh Shillong, namar kam long kaba suk na ka bynta jong ki ban leit rah ïa ki shaduh Shillong.
Kumta, kane hi ka pyni shai ba katei ka jingpynbna khubor da ka sorkar jylla na ka bynta kiba don jinganna, ka long tang kum ka jingpyni ïa ka rukom ba la kohnguh ïa kaei ka jingbthah jong ka sorkar kmie, hynrei ym naduh ka mynsiem lane ba da la pyntreikam pura.
Ka long ruh kaba bym sngew lah ban pdiang ïa ka jingai jingmut ki nongtrei ka koit ka khiah ha kane ka District, kiba la bthah ïa kito kiba haïing jong kiba don jingshitom anna ban wanrah ha kino kino ki por ba don Health Camp kaba ka sorkar kan sa pynbeit. Kane ka long ka khubor kaba pynshaiong ïa ki, namar kim ju kham ïoh khah khah kum kata ka lad wat shisien shi snem ruh.
Kumta, ka bynta kaba kongsan eh ba ka sorkar ka dei ban pyrkhat ïar bha na ka bynta kito kiba pang anna, ka long ba ki dei ban don ki kot ki sla kiba biang ban pynshisha ïa ki jaid jingpang jingshitom, khnang ba kin nym duh ei ïa ki lad jingïarap kiba bun na ka sorkar. Kine ki nongpang baroh ki donkam ïa ki kot ki sla kiba biang (Disabilities Certificates) ban pynshisha, lym kumta yn ym don lad da kumwei pat na ka bynta jong ki.
