Lano ka Smart City sha ka thaiñ ïewduh Motphran kan sdang treikam namar ki khar Metor kim pat khih ban mih: RKJ

Shillong, Naitung :Ka Seng Rympei Kyrsiew Jaitbynriew (RKJ), ka pynpaw ka jingkmen bad sngew ïoh burom ba ka sorkar India ka la jied ïa ka Shillong ruh ban long kum ka Smart City, kawei na ki 100 tylli ki city jong ka ri India.
Ka Seng ka la ong ruh ba kane ka smar city ka long ban pynitynnad ïa ka sor bad ban pynkylluid bad pynsted ruh ïa ka leit ka wan jong ki nongshong shnong baroh. Nalor kata ka sorkar India ka la buh ruh ka ophis ha Shillong tang na ka bynta kane ka kam, bad ka sorkar India ka kwah ruh ban pynsted ïa kane ka kam na ka bynta kane ka la sdang na Laitumkhrah ka ba na ïew Shillong.Ki la dep pynpra ïa ka ba rim, ki la sdang ka jingtrei ka ba thymmai bad ka jingtrei ruh ka la ïaid shaid shaid.
Hynrei na ka liang ka Seng ka buh pat ka jingkylli da ka ba ong kane ka smart city pat sha kane ka thaiñ ïewduh Motphran lano kin sdang treikam namar ba kine ki khar Metor kim pat khih ban mih?
Ka Seng ka la ong ba ka jingpynlong shnong jong kine ki khar Metor hangne ym dei tang ba ki pynjaboh ïa kane ka jaka bad ïa lade hynrei ki pynjaboh ruh ïa kiwei bad ki khanglad ïa ki kam pynroi ha ki ba bun rukom.
Nalor kata ka seng ka la ong ruh ba kane ka dei ka jaka ka ba bun tam eh ki khnai, bad ki iing ruh ki dei ki ba shu shna malu mala bad kine ki khnai ki ïoh jingbam pahuh namar ba bun ki restaurant sawdong jong kane ka jaka.Ym tang katta kine ki khnai ki leit ruh sha ïewduh bad ki bam ïa ki khaw ki dai bad kiwei kiwei ki marbam lehse ka lah ruh ban ktah ïa ngi ki ba leit siew leit tda na ïew lada ngim leh eiei ïa kane ka them metor ka lah ruh ban mih sa kawei ka jingpang khlam na ki khnai ka ba kham ma bad shyrkhei ban ïa ka Corona namar kum kane ka jingjia ka la jia teng ha ki snem ki ba mynshuwa ha Africa ka ba ki khot ka Ebola, kata ha ki snem 2013, 2014.
Shuh shuh ka Seng ka la ong ruh ba ha ka Times of India ka ba Dt. June 1st 2022 ka ïathuh shaphang uta u khñiang jingpang u ba ki khot u Monkey Pox bad une u khñiang jingpang u ïa syriem ïa u Small Pox u ba bit na ki mrad sha u briew, kata lyngba ki mrad ki ba rah ïa une u khñiang jingpang.Kumta ruh kane ka jingpang Monkey Pox ka lah ruh ban mih na ka jinglehsih jong ki khar Metor ka jingbym lehkhuid bad ka shong khapngiah.
Ha ka jingshisha ka Seng ka la ong ba ka kam jong kine ki kahr metor ka dei tang ban pynkhuid ïa ka jakhlia bad ka tulop ka long ka ba rit, hynrei phin ïohi pat ba ki ïeng ki building ïing maw ki ba heh, hato mano ba ai jingbit ym dei ba ki wan ki briew ki ba nabar ban bei tyngka bad shna.
Ha ka juh ka por ka Seng ha u kyrwoh lyngba u Dr. Joseph Syiemlieh, General Secretary ka la ong ba ka jingïaid lynti jong ka jaidbynriew Khasi ha ka synshar khadar, ki ba don ha ka bor ha ka ba ïadei bad kane ka smart city kan long ka ba dkoh bad kan pynsahkut noh ha kane ka kam khar metor, kin hap shim ma ki ka jingkitkhlieh?
Shuh shuh ka Seng ka pynkynmaw ruh ba ka Ri Khasi ka dei ka ri ba la ïoh nam ïoh ïa ka burom na kiwei pat ki jaitbynriew ki ba don sawdong jong ka Ri.U Sardar Vallabhai Patel mynnor haba u wan sha Shillong kata ha ka snem 1948 u ong, “your land is a land fit for the Gods to dwell with fresh air, clean running streams, frest and tasty water, kata ka ba mut , “Ka ri jong phi ka dei ka Ri ka ba biang eh ban shong bad kyrkhu ki Blei ka Ri jong ka Dud bad ka Ngap.”
Kumjuh u phareng (Sahep) u ong ba kane ka dei ka Scotland of the East, mynta shano kita ki lyer Batemon shano kita ki wah duid ba sngur bad ki um ba shngiam.
Kumta ruh na ka liang ka Seng Rympei Kyrsiew Jaitbynriew ka sngewkhia ïa kane bad ka kyntu ruh ïa ki ba ïa don bynta ba kin leh kaei ka ba dei ban leh katba dang don ka por.