Khliehriat, Nailar, 21: Ki nongshong ïew ha Ïawmusiang hapoh ka jingkhmih jong ka Deputy Commissioner ka tnat Food Safety, ka Kong BDS Mukhim lem bad ki nongtrei la pynlong ïa ka jingpynkhuid ïa ka ïew ha sor Jowai.
Ha ka jingpynkhuid la ïa shimbynta lang da ki trai dukan na ki Committee ïew, 200 ngut ki dkhot na ka NCC na ki khyndai tylli ki skul bad ki samla pule na ki college.
Ka Ïawmusiang ha Jowai, ka dei ka ïew kaba la rim bha bad ka ïew kaba paw bha ha rilum Jaiñtia bad lah ban ong ba ka jingïashim bynta ki nong shong dukan, ki samla na ki skul, ki college ka pynpaw shynna ïa ka mynsiem ïatreilang ban wanrah ïa ka khuid ka suba ha ïew ha hat bad la sakhi ruh ba ki nongshong ïew ki la kyrshut bad sait khuid ïala ki jong ki dukan, ki basa jong ki shuh shuh ki la ai rong aisa rup ruh ïa ki dukan khnang ba ki dukan kin long kiba iphuh iphieng bad ïa ki ñiut ki jakhlia kiba mih na kaba jingpynkhuid la shimti da ka Jowai Municipal Board bad bret ïa ki.
Ha shwa ban pynlong ïa ka jingpynkhuid la pynlong ïa ka jingïalang ha kaba ka Kong BDS Mukhim ka la kyntu ban don ka jingïatreilang na ka bynta ban wanrah bad ban pynneh pynsah ïa ka khuid ka suba ha ka imlang ka sahlang bad ong ruh ba dei tang lyngba ka jingïatreilang ba yn sa lah ban wanrah ïa ka khuid ka suba wat ha ki shnong ki thaw ha ka imlang ka sahlang ka ban wanrah ruh ïa ka sawdong sawkun kaba bit na ka bynta ka koit ba khiah.
Ka Assistant Commissioner jong ka tnat Food Safety, ka LBR Marak, ka la ban jur ïa ka jingdonkam ka khuid ka suba bad kyntu ïa ki paidbah ba kin don ruh ka jingkitkhlieh lang ha kaba pynneh pynsah ïa ka jingkhuid jingsuba, ka la bynrap ruh ba kaba pynneh pynsah ïa ka khuid ka suba ka long ruh kum shibynta ka jingpynneh pynsah ïa ka mariang bad wanrah ïa ka jing khuid ha ka mariang bad pynlong ïa ka mariang kaba biang na ka bynta ka koit ka khiah
Ka Assistant Commissioner ka la pynpaw ka jingsngewnguh bad ai khublei ïa ka tnat Food Safety kaba la shim ïa kane ka synjam bad ai khublei ruh ïa baroh kiba la ïa shim bynta shitrhem lang ha kane ka jingpynkhuid ïa ka Ïawmusiang.
